ДОМОСТРОЙ. Сильвестровскій изводъ

„Домострой“, безспорно, принадлежитъ къ числу важнѣйшихъ памятниковъ нашей древней письменности, имѣю­щихъ одинаково важное значеніе и для историка народ­наго быта, и для историка литературы, и для юриста.

По изданію И. Глазунова. С.-Петербургъ. 1891 г.

Книга, глаголемая Домострой, имѣетъ въ себѣ вещи зело полезны, во ученіе и наказаніе всякому христіянину, мужу и женѣ, и чадомъ, и рабомъ, и рабынямъ; въ ней же имать сказаніе главамъ.

1. Наказаніе отъ отца къ сыну.

2. Како христіяномъ вѣровати во Святую Троицу, и Пречистую Богородицу, и Кресту Христову, и святымъ небеснымъ безплотнымъ силамъ, и всѣмъ святымъ, и честнымъ и святымъ мощемъ поклонятися имъ.

3. Како тайнамъ Божіимъ причащатися, и вѣровати воскресенію мертвыхъ, и страшнаго суда чаяти, и касатися всякой святыни.

4. Како любити Бога отъ всея душа; такоже брата своего; и страхъ Божій имѣти, и память смертную.

5. Како святительскій чинъ почитати; такоже и священническій чинъ, и мнишескій.

6. Како посѣщати въ монастырѣхъ и въ болницахъ и въ темницахъ и всякаго скорбна.

7. Како царя и князя чтити и повиноватися во всемъ, и всякому покорятися, и правдою служити имъ во всемъ къ болшимъ и меншимъ, и скорбнымъ и маломощнымъ ко всякому человѣку, какову быти, и себѣ о семъ внимати.

8. Како домъ свой украсити святыми образы, и домъ чистъ имѣти.

9. Како къ церквамъ Божіимъ и въ монастыри съ приношеніемъ приходити.

10. Како священниковъ и иноковъ въ домъ свой призывати молитися.

11. Како кормити приходящихъ въ дому съ благодареніемъ.

12. Како мужу съ женою и домочадцы въ дому своемъ молитися.

13. Како въ церкви мужу и женѣ молитися, чистота хранити, и всякого зла не творити.

14. Како чтити дѣтемъ отцовъ своихъ духовныхъ и повиноватися имъ.

15. Како дѣтей своихъ воспитати во всякомъ наказаніи и страсѣ Божіи.

16. Како чадъ воспитати; съ надѣлкомъ замужъ выдати.

17. Како дѣти учити и страхомъ спасати.

18. Како дѣтемъ отца и мати любити, и беречи, и повиноватися имъ, и покоити ихъ во всемъ.

19. Како всякому человѣку рукодѣльничати, и всякое дѣло дѣлати, благословяся.

20. Похвала женамъ.

21. Наказъ мужу и женѣ и людемъ и дѣтемъ: како лѣпо быти имъ.

22. Каковы люди дерьжать и какъ о нихъ промышлять: во всякомъ ученіи, и въ божественныхъ заповѣдяхъ и въ домовномъ строеніи.

23. Како врачеватися христіяномъ отъ болѣзни и отъ всякихъ скорбей.

24. О неправедномъ житіи.

25. О праведномъ житіи.

26. Како жити человѣку смѣтя свой животъ.

27. Аще кто не разсудя себя живетъ.

28. Аще кто слугъ держитъ.

29. Како поучати мужу своя жена.

30. Добрыя жены рукодѣльныя плоды и береженье всему.

31. Какъ всякое платье кроити и остатки и обрѣзки беречи.

32. Всякая порядня домашняя держати.

33. По вся государыни дни дозирати у слугъ всего: и домашней порядни, и рукодѣлья, и о самой ей, и о всякомъ береженіи и строеніи.

34. По вся дни женѣ съ мужемъ о всемъ спрашиватися и совѣтовати о всемъ.

35. Како слугъ наказывати.

36. Женамъ наказъ о пьяньствѣ и о пьяномъ питіи, и слугамъ такожъ; и о потаи не держати ничево нигдѣ; и слугъ лжи и клеветы не слушати безъ исправы какъ ихъ наказывати грозою, и жену тако же, и какъ въ гостехъ быти, и дома себя устроивати во всемъ.

37. Какъ платье всякое женѣ носити и устроити.

38. Како избная порядня устроити хорошо и чисто.

39. Аще мужъ самъ не учитъ, ино судъ отъ Бога пріиметъ; аще самъ творитъ и жену и домоча дцовъ учитъ, милость отъ Бога пріиметъ.

40. Самому государю, или кому прикажетъ, годовой запасъ и всякій товаръ купити.

41. Себѣ на обиходъ купити всякой товаръ заморской, и изъ далныхъ земель.

42. О томъ же: коли что купитъ у кого селъ нѣтъ; и всякой домашней обиходъ, и лѣтѣ и зимѣ; и какъ запасати въ годъ, и дома животина водити всякая; и ѣства и питіе держати всегды.

43. А толко мужъ припасетъ въ годъ всякаго запасу, и постного, и тому устрой.

44. О запасной прибыли впередъ.

45. Огородъ и садъ какъ водить.

46. Какъ человѣку запасное питье держать про себя и про гость и какъ устроити то при людехъ.

47. Тому же пивоваренной наказъ: какъ пиво варить и какъ медъ сытити и вино курити.

48. У поваровъ и у хлѣбниковъ, и вездѣ, всякой порядни ключнику дозирать.

49. Мужу съ женою совѣтовати, какъ ключнику приказати о столовомъ обиходѣ, о поварнѣ и о хлѣбнѣ.

50. Ключнику приказъ, какъ пиръ лучится.

51. Наказъ отъ государя ключнику: какъ ѣства постная и мясная варить, и кормить семья, въ мясоѣдъ и въ постъ.

52. Въ житницахъ и въ закромѣхъ о береженьи.

53. Въ сушилѣ тако же смотрити.

54. Въ погребѣ и на ледникѣ всего беречи.

55. А въ клѣтехъ и въ подклѣтехъ, и въ онбарехъ, устроити всякая порядня ключнику, по государеву наказу.

56. Въ сѣнницахъ сѣно, и въ конюшняхъ лошади, и на дворѣ, и дровяной запасъ устроити, и всякая животина.

57. Въ поварняхъ и въ хлѣбняхъ и въ дѣловыхъ избахъ устроити дѣланое.

58. На погребѣхъ, и на ледникѣхъ, и въ житницахъ, и въ сушилѣхъ, и въ амбарѣхъ, въ конюшняхъ, часто государю смотрити.

59. Съ слугами государю смѣтяся во всемъ, по тому ихъ жаловати.

60. О торговыхъ и о лавочныхъ людѣхъ по тому же, счетъ съ ними часто держати.

61. Какъ дворъ строити, или лавка, или деревня или анбаръ.

62. Какъ дворовое тягло плотитъ, или съ лавки поземъ, или съ деревни подать, и должникомъ долгъ всякой платить.

63. Указъ ключнику, какъ держать на погребѣ всякой запасъ просольной, и въ бочкахъ, и въ кадѣхъ, и въ мѣрникахъ, и во тчанѣхъ, и въ ведерцахъ: мясо, рыба, копуста, огурцы, сливы, лимоны, икра, рыжики, грузьди.

64. Посланіе и наказаніе отъ отца къ сыну.

Да здѣ имать конецъ главамъ

Аминь.

Тако же: Указъ свадебному чину

1. Наказаніе отъ отца къ сыну.

Благословляю азъ грѣшный, имя рекъ, и поучаю, и наказую, и вразумляю сына своего, имя рекъ, и его жену, и ихъ чадъ и домочадцовъ: быти во всякомъ христіянскомъ законѣ, и во всякой чистой совѣсти и правдѣ; съ вѣрою творяще волю Божію, и храняще заповѣди Его; себе утверждающе во всякомъ страсѣ Божіи, и въ законномъ жительствѣ; и жену поучающе, такоже и домочадцовъ своихъ наказующе: не нужею, ни ранами, ни работою тяжкою; имѣюще яко дѣти, во всякомъ покоѣ: сыты и одѣны, и въ тепломъ храмѣ, и во всякомъ устроѣ. И вдаю вамъ христіанскому жительству писаніе се на память, и вразумленіе: вамъ и чадомъ вашимъ. Аще сего моего писанія не внемлете, и наказанія не послушаете, и потому не учнете жити, и не тако творити, яко же есть писано, — сами себѣ отвѣтъ дадите въ день страшнаго суда; и азъ вашимъ винамъ, и грѣху, не причастенъ: кромѣ моея души; азъ о семъ, всякомъ благочиніи благословлялъ, и плакалъ, и молилъ и поучалъ, и писаніе предлагалъ вамъ; и аще воспріимете сіе мое худое ученіе и грубое наказаніе, и сіе со всею чистотою душевною; и прочитая, прося у Бога помощи и разума, по елику возможно, какъ Богъ вразумитъ васъ: и начнете дѣломъ творити вся си: будетъ на васъ милость Божія, и Пречистыя Богородицы, и великихъ чудотворцевъ, и наше благословеніе, отнынѣ и до вѣка, и домъ вашъ, и чада ваша, и стяжаніе ваше, и обиліе ваше, что вамъ Богъ подаровалъ: отъ нашего благословенія, и отъ своихъ трудовъ: да будетъ благословенно, исполнено всякихъ благъ, во вѣки, аминь.

2. Како христіяномъ вѣровати во Святую Троицу, и Пречистую Богородицу, и Кресту Христову, и святымъ небеснымъ безплотнымъ силамъ, и всѣмъ святымъ, и честнымъ и святымъ мощемъ поклонятися имъ.

Подобаетъ убо всякому христіанину по Бозѣ жити, въ православней вѣрѣ христіанстей. Первѣе убо: отъ всея души и отъ всего помышленія, и всѣми чувствы, теплою вѣрою вѣровати во имя Отца, н Сына и Святаго Духа, въ Нераздѣлимую Троицу; и воплощенію Господа нашего Іисуса Христа, Сына Божія, вѣруй; и рожьшую его Матерь: „Богородицу“ нарицай. Кресту же Христову съ вѣрою покланяйся: яко на томъ, намъ всѣмъ, спасеніе содѣла Господь; иконѣ же Христовѣ, и Пречистей Его Матери, и всѣмъ небеснымъ силамъ безплотнымъ, и всѣмъ святымъ, честь съ вѣрою воздавай яко самѣмъ, любовно, въ молитвѣ си глаголи, и покланяніе твори, и на помощь къ Богу призывай ихъ. Мощи же Святыхъ съ вѣрою цѣлуй, и покланяйся имъ.

3. Како тайнамъ Божіимъ причащатися, и вѣровати воскресенію мертвыхъ, и страшнаго суда чаяти, и касатися всякой святыни.

Тайнамъ Божіимъ вѣруй; тѣлу Его, крови, вѣруй: причащатися и со страхомъ, на очищеніе и освященіе души же и тѣлу, и во оставленіе грѣхомъ, и въ жизнь вѣчную. Вѣруй воскресенію мертвымъ и жизни будущаго вѣка. Помяни: страшный судъ и воздаяніе по дѣломъ будетъ намъ. Аще когда, пріочистивъ себе духовно, въ чистой совѣсти, съ молитвою и съ моленіемъ, цѣловати животворящій крестъ, и святыи, честныи образы чудотворныя, многоцѣлебныя мощи: по моленіи, прекрестяся, поцѣловати, духъ въ себѣ удержавъ; а губъ не разѣваючи, а благоволитъ Богъ кому причасьтитися Божественныхъ Христовыхъ Таинъ, ино лжицею, отъ Іерея, пріимати во уста опасно: губами не сверкати, руце имѣти къ персемъ согбени крестообразно: а Дора́ и просфира, и всякая святая, вкушати бережно, крохи на землю не уронити, а зубами просфиры не кусати, якоже прочій хлѣбъ: уломываючи не велики кусочки, класти въ ротъ; ѣсти губами и ртомъ не чавкати, со опасеніемъ ѣсти; а просфиры съ воло́гою не ѣсти; токмо воды прихлебывати, или укропу, съ виномъ служенымъ или безъ вина, а иного ничего не примѣшати; преже всякія ѣствы свершати просфира, въ церкви или въ дому; а, и съ кутьею, никако же, просфиры не ѣсти; ни съ кануномъ и на кутью просфиры не класти. Аще съ кѣмъ о Христѣ цѣлованіе сотворили, такоже: духъ въ себѣ удержавъ, поцѣловатися; а губами не плюскати. Поразсуди человѣческія немощи: нечювьственнаго духа гнушаемся, — чесночного, хмѣлного, болного и всякого смрада: коль мерско Господеви нашъ смрадъ и обоняніе; сего ради со опасеніемъ творити.

4. Како любити Бога отъ всея душа; такоже брата своего; и страхъ Божій имѣти, и память смертную.

По семъ же возлюбити Господа Бога твоего отъ всея душа своея, и отъ всея крѣпости своея, и подвигни вся твоя дѣла и обычая и нравы, — угодная творити но заповѣди Его. Паки же искреняго си возлюби: всякаго человѣка, по образу Божію созданна, рекше: всякаго христіанина. Страхъ Божій всегда имѣй въ сердцѣ своемъ и память смертную: всегда волю Божію творити и по заповѣдемъ Его ходи. Рече Господь: въ чемъ тя застану въ томъ и сужу: ино достоитъ всякому христіанину готову быти въ добрыхъ дѣлѣхъ, въ чистотѣ и въ покаяніи, и во всякомъ исповѣданіи, всегда чающе часа смертнаго.

О томъ же бо. Возлюбиши Господа отъ всея душа, и страхъ Его да будетъ во сердци твоемъ, праведенъ буди и истиненъ. и смиренъ, очи долу поницая, умъ же къ небеси простирая умиленъ къ Богу и человѣкомъ привѣтливъ. Печалнаго утѣши, терпѣливъ въ напастехъ и недосадитель, всякому человѣку щедръ, милостивъ, нищекормилецъ, страннопріимникъ, скорбенъ грѣха ради, веселъ о Богѣ, алченъ буди отъ піянства и жаденъ отъ объядѣнія, кротокъ, не словохотенъ, не златолюбецъ, но друголюбецъ, не гордъ, боязливъ предъ Царемъ, готовъ въ повелѣніи его, въ отвѣтехъ сладокъ, часто молитвенникъ, разуменъ трудникъ къ Богу и не осудникъ всякому человѣку, поборникъ обидимымъ, не лицемѣренъ, чадо евангелія, сынъ воскресенія, наслѣдникъ будущія жизни о Христѣ Ісусе Господѣ нашемъ, Ему жъ слава во вѣкъ.

5. Како святительскій чинъ почитати; такоже и священническій чинъ, и мнишескій.

Ко святительскому чину всегда прибѣгай, и должную честь имъ воздавай; и благословенія, и духовнаго поученія отъ него требуй отъ нихъ; и припадай къ ногамъ ихъ, и во всемъ повинуйся имъ по Бозѣ. Священническому чину и мнишескому велію вѣру и любовь и повиновеніе и всякое покореніе предъ ними имѣй; и духовную ползу отъ нихъ внимай: тѣ убо суть слуги и молебники Небеснаго Царя; имѣютъ дерзновеніе у Господа просити добрыхъ и полезныхъ душамъ нашимъ, и оставленіе грѣховъ и жизни вѣчьныя.

6. Како посѣщати въ монастырѣхъ и въ болницахъ и въ темницахъ и всякаго скорбна.

Въ монастыри и въ болницы и въ пустыни, и въ темницы заключенныхъ, посѣщай, и милостыню, по силѣ, всякихъ потребныхъ подавай, елико требуютъ; и види бѣду ихъ и скорбь и всяку нужу, елико возможно помогай имъ; и всякаго скорбна, и бѣдна и нужна, и нища, не презри; введи въ домъ свой: напой, накорми, согрѣй, одежи́, всею любовію и чистою совѣсьтію: тѣми милости́ва Бога сотвориши и свободу получи́ши. А родителемъ своимъ преставльшимся память твори: къ церквамъ Божіимъ приношеніе и въ дому по нихъ кормлю твори: нищимъ милостыню; и самъ отъ Бога помяновенъ будеши.

7. Како царя и князя чтити и повиноватися во всемъ, и всякому покорятися, и правдою служити имъ во всемъ къ болшимъ и меншимъ, и скорбнымъ и маломощнымъ ко всякому человѣку, какову быти, и себѣ о семъ внимати.

Царя бойся и служи ему вѣрою, и всегда о немъ Бога моли и ложно отнюдь не глаголи предъ нимъ; но, съ покореніемъ, истину отвѣщай ему, яко самому Богу, и во всемъ повинуйся ему. Аще земному царю правдою служиши, и боишися его: тако научишися и Небеснаго Царя боятися: сей времененъ, а Небесный вѣченъ и судія нелицемѣренъ: воздастъ комуждо по дѣломъ его. Такоже и княземъ нокоряйтеся, и должную ему честь воздавай, яко отъ него посланомъ, во отмщеніе злодѣемъ, въ похвалу же добродѣемъ. Князю своему пріяйте всѣмъ сердцемъ, и властелемъ своимъ: ни мыслите на ня зла. Глаголетъ бо Павелъ Апостолъ: вся владычества отъ Бога учинена суть: да, аще кто противится властелемъ, то Божію повелѣнію противится. А царю и князю и всякому вельможѣ не пещися служити лжею и клеветою и лукавствомъ, погубитъ Господь вся глаголющая лжу, а шепотники и клеветники отъ народа прокляти суть. Старѣйшимъ себѣ честь воздавай, и поклоненіе твори; среднихъ яко братію почитай; маломожныхъ и скорбныхъ любовію привѣчай; юнѣйшихъ яко чада люби; всякому созданію Божію не лихъ буди; славы земныя ни въ чемъ не желай; вѣчныхъ благъ проси у Бога; всякую скорбь и тѣсноту съ благодареніемъ терпи; обидимъ не мсти, хулимъ моли; зла за зло не воздавай; согрѣшающая не осуждай; воспомяни своя грѣхи: о тѣхъ крѣпко пекися; злыхъ мужей совѣту отвращайся; буди ревнитель правожительствующимъ, и тѣхъ дѣланія написуй въ сердцѣ своемъ, и самъ такоже твори.

8. Како домъ свой украсити святыми образы, и домъ чистъ имѣти.

Въ дому своемъ, всякому христіянину, во всякой храминѣ, святые и честные образы, написаны на иконахъ, по существу, ставити на стѣнахъ, устроивъ благолѣпно мѣсто со всякимъ украшеніемъ и со свѣтильники, въ нихъ же свѣщи предъ святыми образы возжигаются, на всякомъ славословіи Божіи; и по отпѣтіи погашаютъ; завѣсою закрываются, всякія ради чистоты, потъ пыли: благочинія ради и бреженія: а всегда чистымъ крылышкомъ ометати, и мягкою губою вытирати ихъ, и храмъ тотъ чистъ держати всегда; а къ святымъ образомъ касатися, достойнымъ, въ чистей совѣсти; и на славословіи Божіи, и на святомъ пѣніи и молитвѣ, свѣчи вжигати, и кадити благовоннымъ ладономъ и ѳиміамомъ, а образы святые поставляются иже въ началѣ, по чину, свято почитаеми суть, имени прежереченными; въ молитвахъ и во бдѣніяхъ, и въ поклонѣхъ, и во всякомъ славословіи Божіи, всегда почитати ихъ; со слезами, и съ рыданіемъ, и сокрушеннымъ сердцемъ исповѣдаяся просяще отпущенія грѣхомъ.

9. Како къ церквамъ Божіимъ и въ монастыри съ приношеніемъ приходити.

А къ церквамъ Божіимъ всегда съ вѣрою приходити: съ приношеніемъ, съ свѣчею и съ просфирою, съ ѳиміамомъ и съ ладономъ, съ канономъ н съ кутьею, и съ милостынею. И за здравіе и за упокой и къ праздникамъ, и по монастыремъ, тако съ милостынею и съ приношеніемъ приходити. Егда принесеши даръ свой къ олтарю, воспоминай Евангельское слово: егда нѣчто имать братъ твой на тя, остави ту даръ свой предъ олтаремъ, и шедъ, смирися съ братомъ своимъ прежде; тогда принеси даръ свой къ Богу, отъ праведнаго своего имѣнія: отъ неправды непріятна милостыня. Къ сильнымъ речено бысть: луче не грабити неже милостыня даяти отъ неправды; отдай обидимому, пріятнѣе милостыни; а къ Богу пріятна милостыня отъ праведнаго стяжанія и отъ добрыхъ дѣлъ.

10. Како священниковъ и иноковъ въ домъ свой призывати молитися.

А въ которые либо праздники, по обѣщанію своему, да призываютъ священническій чинъ въ домъ свой, елико по силѣ, и молебная совершаютъ о всякомъ прошеніи; и молятъ за Царя и Великаго Князя, имя рекъ, всея Руси Самодержца, и за его Царицу и Великую Княгиню, имя рекъ, и за ихъ благородныя чада, и за братью его, и за боляре, и за все христолюбиво воиньство, иже побѣду на враги; и о плѣненныхъ свободѣ и о всемъ священническомъ и иноческомъ чинѣ, и о всякомъ прошеніи, и за вся христіаны, и о домовнемъ: мужѣ и женѣ, и о чадѣхъ, и о домочадцѣхъ, и о всѣхъ полезныхъ имъ. Аще когда требуютъ, и воду святятъ животворящимъ крестомъ, и съ чудотворныхъ образовъ и съ честныхъ святыхъ мощей, и за болящаго и масло свящаютъ, во здравіе и исцѣленіе. А коли масло свящати надъ болящимъ въ дому, да призовутъ седмь священниковъ, или множае, а дьяконовъ сколько лучится. А масло свящаютъ и вси дѣйствуютъ по уставу. А каженіе по всѣмъ храмомъ отъ дьякона или отъ попа; и святою водою кропленіе и честнымъ крестомъ осѣненіе отъ большаго попа. И вкупѣ, въ дому семь, благодаряще Бога, по Божественней Литургіи, трапезу поставляютъ; ядятъ и пьютъ, священническій чинъ и мнишескій, и прочій приходящій, а маломожніи тутожъ; и удоволены всячески, и одарены, отходятъ въ домы своя, благодаряще Бога. — Тако же и по родителяхъ представлшихся память творятъ: во святыхъ Божіихъ церквахъ и монастырѣхъ панихиды соборне пѣти, и Божественная Литургія служити и въ трапезѣ братія кормити, и за упокой и за здравіе, и въ домъ свой призывати и кормити и поити, и милостыня творити.

А вода святити Генваря 6-го и Августа 1-го всегда единымъ животворящимъ крестомъ, погружая его по трижды въ чаши, святитель или священникъ, глаголюще тропарь: „Спаси, Господи, люди своя“ трижды. А на Богоявленьевъ день тропарь: „Во Іордани крещающу ти ся, Господи“, трижды. А на блюдѣ лежатъ святые кресты и иконы, и чудотворныя святыя мощи. Изъ чаши вынимая крестъ, надъ блюдомъ держитъ; и со креста идетъ вода на ту святыню; и по погруженіи креста, и по освященіи святыя воды, помазуютъ губо́ю, омакая въ ту святую воду, честные кресты и святыя иконы и чудотворныя мощи, елико суть во святѣмъ храмѣ или въ дому, глаголюще тропари коемуждо Святому, святую икону помазующе; и съ тѣхъ иконъ губку выжимати въ ту же святую воду; и паки иныя святыни помазати такожде, и тою святою водою кропить олтарь и весь святый храмъ, крестообразно; и въ дому́ такожде по всѣмъ храмомъ кропити и народъ весь; и достойніи съ вѣрою помазуются, и пьютъ ея, на исцѣленіе и очищеніе душамъ и тѣломъ, и во оставленіе грѣховъ и въ жизнь вѣчную. А подати кому ясти или пити, государю дому, или отъ предстоящихъ его, или въ столъ, или послати куды, разсуждая по достоинству, и по чину и по совѣту: вся сія отъ большаго да бываетъ; а отъ прочихъ сіе не бываетъ. Аще за любовь или за нѣкое послуженіе: искусно да сдѣлаются; и, о семъ, прощаются у настоящаго. А отъ стола или отъ трапезы ѣства и питіе тайно износити, или высылати, не по повелѣнію настоящаго, и безъ благословенія, святотатство суть и самочиніе: таковыхъ всячески безчествуютъ. Егда званъ будеши кимъ на́ бракъ, не сѣди́ на преднемъ мѣстѣ: егда кто честнѣе тебѣ будетъ званныхъ имъ, и пришедъ иже тебѣ званый оного речетъ, ты даждь сему мѣсто. И тогда начнеши со студомъ посьлѣднее мѣсто держати. Но егда званъ будеши, шедъ, сяди на послѣднемъ мѣстѣ; да егда пріидетъ званый тя, и рѣчетъ ти: друже, посяди выше; тогда будетъ ти слава преди. возлежащими съ тобою; яко всякъ возносяйся смирится, а смиряйся вознесется.

Егда на трапезѣ предпоставятъ ти многоразличныя яди и питія: егда кто честнѣе тебѣ будетъ званныхъ, не начни вкушати, преже, ничтоже. Аще ты начальственъ будеши, предпоставленную ядь разсужая начинай. У нѣкихъ боголюбцевъ изообилно бываетъ вкушеніе и питіе, и излишнее цѣло́ снимаютъ; и впередъ, инымъ, на потребу пригожается; и аще кто нечювьственъ, и не искусенъ, и не ученъ, и невѣжда, не разсуждая, всякаго брашна въ пресыщенія, начинаетъ, и небрегомо творитъ, — будетъ и самъ поруганъ, посмѣянъ, и обещестенъ, отъ Бога и отъ человѣкъ.

11. Како кормити приходящихъ въ дому съ благодареніемъ.

Егда трапезу предпоставляеши, вначалѣ священницы Отца и Сына и Святаго Духа прославляютъ, потомъ Дѣву Богородицу; и егда ядяху съ благодареніемъ и съ молчаніемъ или съ духовною бесѣдою, тогда Ангели невидимо предстоятъ, и написуютъ дѣла добрая; и ѣства и питіе въ сладость бываетъ. — Аще начнетъ предпоставленную ѣству и питіе похулятъ, тогда мотыло обращается сіи вкушаютъ и, аще скаредныя рѣчи, и блудные срамословіе и смѣхотвореніе, и всякое глумленіе, или гусли и плесаніе, и плесканіе и скоканіе и всякіе игры́, и пѣсни бѣсовскіе, — тогда, якоже дымъ отгонитъ пчелы, такоже и отыдутъ Ангели Божіи отъ тоя трапезы и смрадныя бесѣды; и возрадуются бѣси; и пріидутъ, волю свою улучивъ, и вся угодная творится имъ; да тако же безчиньствуютъ и зернью и шахматы, и всякими игра́ми бѣсовскими тѣшатся; даръ Божій, ѣству и питіе, и всякіе овощи́, въ поруганіе помѣщутъ, и проливаютъ, другъ друга шибаютъ и обливаютъ; всячески поругаются дару Божію. А діяволи записуютъ дѣла ихъ, приносятъ къ сотанѣ, и вкупѣ радуются погибели хртстіяньскія. И та вся дѣла предстанутъ въ день страшнаго суда. О, горе дѣющимъ таковая! Егда Жидове сѣдоша ясти, въ пустыни, и пити, и обьядшася и опившеся, и восташа играти и блудъ творити, и тогда пожре земля ихъ двадесять тысящъ, и три тысящи. О, устрашитеся, людіе; творите волю Божію, яко же есть въ законѣ писано; а отъ сего злаго безчинія, соблюди, Господи, всякаго христіанина: ѣсти бы и пити въ славу Божію, а не объядатися, ни упиватися, ни пусто́шныхъ творити! И аще предъ кого поставляеши ѣству или питіе и всякое брашно, или предъ тебя поставятъ всякаго брашна, не подобаетъ похули́ти: глаголати: гнило или кисло, или пресно или со́лоно, или горко или затхло́ся, или сы́ро или переварено́, или какую ни буди хулу возлогати; но подобаетъ даръ Божій, всякое брашно, похваляти, и со благодареніемъ вкушати; ино: Богъ обоняетъ вонею благоуханія, и въ сладость претворити; и аще которая ѣства или питіе непотребно, ино о томъ наказывати домочадцовъ, кто то дѣлалъ, чтобы впередъ таково́ не было.

12. Како мужу съ женою и домочадцы въ дому своемъ молитися.

По вся дни, въ вечерѣ, мужъ съ женою, и съ дѣтьми и съ домочадцы, кто умѣетъ грамотѣ, отпѣти вечерня, павечерница, полунощница, съ молчаніемъ и со вниманіемъ, и съ кроткостояніемъ, и съ молитвою, и съ поклоны. Пѣти внятно и единогласно. Послѣ правила, отнюдь ни пити, ни ѣсти, ни молвы творити, всегда; всему тому наукъ. А ложася спати, всякому христіянину по три поклона въ землю предъ Богомъ положити. А въ полунощи, всегда, тайно вставъ, со слезами, прилежно, къ Богу молитися, елико вмѣстимо, о своемъ согрѣшеніи; а утре, воставая, такоже, и комуждо по силѣ и по желанію; а непразнымъ женамъ кланятися до пояса. Всякому христіянину молитися о своемъ согрѣшеніи, и пущенія грѣхомъ, и о Царьскомъ и о Царицинѣ, и о чадѣхъ ихъ здравіи, и о братіи его, и о болярѣхъ его, и о христолюбивомъ воиньствѣ, о помощи на враги, и о плѣненыхъ свободѣ, и о святительскомъ и священническомъ чину, и о болящихъ и въ темницахъ заключеныхъ, и за вся христіяне. Женѣ молитися о своемъ согрѣшеніи, и о мужи, и о чадехъ, и о домочадцехъ, и о сродникѣхъ, и о отцѣхъ духовныхъ; а мужу тако же. А утре, вставъ, Богу молитися, и отпѣти заутреня и часы, а въ недѣлю и въ празникъ молебенъ, съ молитвою и молчаніемъ, и съ кроткостояніемъ, и единогласно пѣти, и со вниманіемъ слушати; и Святымъ каженіе. А гдѣ не кому пѣти, ино молитися доволно, вечере и утре; а мужемъ отнюдь не погрѣшити по вся дни церковнаго пѣнія: вечерни, заутрени, обѣдни.

13. Како въ церкви мужу и женѣ молитися, чистота хранити, и всякого зла не творити.

А въ церкви стояти на всякомъ пѣніи со страхомъ, и съ молчаніемъ молитися; а дома всегда павечерница и полунощница и часы пѣти; а кто прибавитъ правила своего ради спасенія: ино то на его воли: ино болѣ мзда отъ Бога. А жена́мъ ходити къ церкви Божіи какъ вмѣстимо, на произволеніе, по совѣту съ мужемъ; а въ церькви ни съ кѣмъ не бесѣдовати, съ молчаніемъ, и послуша, стояти, никуда не обзираяся; ни на стѣну не прикланятися, ни къ столпу; ни съ посохомъ не стояти; ни съ ноги на ногу не переступати; руцѣ согбени къ персемъ, крестообразно, твердо и непоколебимо молитися со страхомъ и трепетомъ, и со воздыханіемъ и со слезами, и до отпѣнія изъ церкви не изходити, а прійти къ началу. А недѣля, и празники господскіе и среду и пятокъ, и святый постъ и Богородиченъ, въ чистотѣ пребывати; а отъ объяденія н ніяньства, и отъ пустотныхъ бесѣдъ и смѣхотворенія неподобнаго, всегда беречися, и отъ татьбы, и отъ лжи и клеветы и зависти; и всякаго неправеднаго собранія, и ростовъ и корчмы и мыта́, и перевозовъ и мостовщины, и всякаго лукавства не любити; и не гнѣватися ни на кого; раннаго питія и яденія, и позного, послѣ пѣнія, отнюдь не творити; ѣсть бы и пить въ славу Божію, и въ подобно время. Малымъ дѣтемъ, и рабо́тнымъ, по разсуженію мужа и жены, кормити ихъ. Или не вѣсть яко неправедницы Царствія Божія не наслѣдятъ: якоже Апостолъ Павелъ рече: аще нѣкій братъ именуемъ: или лихоимецъ, или идолослужитель, или ругатель, или пьяница или хищникъ, — съ таковыми ни ясти ни пити. И паки рече: ни идолослужители, ни сквернители, ни лихоимцы, ни татіе, ни пьяницы, ни досадителе, ни хищницы, Царствія Божія не наслѣдятъ; но достоитъ отъ всякаго зла блюстися всякому христіянину.

14. Како чтити дѣтемъ отцовъ своихъ духовныхъ и повиноватися имъ.

Подобаетъ вѣдати се́: како чтити дѣтемъ отцовъ своихъ духовныхъ. Изыскати отца духовнаго добра́, боголюбива, и благоразумна и разсудительна, а не потаковника, пьяницу; ни сребролюбива, ни гнѣвлива; такова́ подобаетъ чтити, и повиноватися ему во всемъ; и каятися предъ нимъ со слезами; исповѣдати грѣхи своя не стыдно и безсрамно; и заповѣди его хранити. А призывати его къ себѣ въ домъ часто и извѣщатися всегда, во всякой совѣсти; и наказаніе его съ любовію пріимати, и послушати его во всемъ, и чтите его, и бейте челомъ предъ нимъ ниско; онъ учитель нашъ и наставникъ; и имѣйте его со страхомъ и любовію; къ нему приходите, и приношеніе ему давайте, отъ своихъ трудовъ по силѣ; и совѣтовати съ нимъ часть о житіи полезномъ, и востязатися отъ грѣховъ своихъ; и како учити и любити мужу жена своя и чада, а женѣ мужа своего слушати, и спрашиватися по вся дни; а извѣщатися о грѣсѣхъ своихъ всегда предъ отцемъ духовнымъ, и обнажати грѣхи своя вся, и покарятися предъ нимъ во всемъ: тіи бо бдятъ о душахъ нашихъ, и отвѣтъ дадутъ о насъ въ день страшнаго суда; а не поносити ихъ, ни осужати, ни укоряти; а, о комъ учнутъ печаловатися, ино его слушати, и виноватаго пожаловати, по винѣ смотря, съ нимъ же разсуди.

15. Како дѣтей своихъ воспитати во всякомъ наказаніи и страсѣ Божіи.

А пошлетъ Богъ, у кого дѣти, сынове или дщери: ино имѣти попеченіе отцу и матери о чадѣхъ своихъ: снабдити ихъ и воспитати въ добрѣ наказаніи; и учити страху Божію и вѣжеству и всякому благочинію; и, по времени и дѣтемъ смотря, и по возрасту, учити рукодѣлію; матери дщери, а отцу сынове, кто чего достоинъ, каковъ кому просугъ Богъ дастъ; любити ихъ и беречи, и страхомъ спасати. Уча и наказуя, и разсужая, раны возлагати: наказуй дѣти во юности, покоитъ тя на старость твою; и хранити и блюсти о чистотѣ тѣлесней, и отъ всякаго грѣха, отцемъ чадъ своихъ, яко же зѣницу ока, и яко своя душа. Аще что дѣти согрѣшаютъ отцовымъ и матернимъ небреженіемъ, имъ о тѣхъ грѣсѣхъ отвѣтъ дати въ день страшнаго суда. А дѣти аще небрегомы будутъ, въ ненаказаніи отцовъ и матерей, аще что согрѣшатъ, или что зло сотворятъ, и отцемъ и матеремъ, съ дѣтьми, отъ Бога грѣхъ, а отъ людей укоръ и посмѣхъ, а дому тщета, а себѣ скорбь и убытокъ, а отъ судей продажа и соромота. Аще у богобоязнивыхъ родителей, и у разумныхъ и благоразсудныхъ, чада воспитани въ страсѣ Божіи, и въ добрѣ наказаніи, и въ благоразсудномъ ученіи, всякому разуму и вѣжству и промыслу и рукодѣлію, и тѣ чада съ родители своими бываютъ отъ Бога помиловани, а отъ священнаго чину благословены, а отъ добрыхъ людей хвалими; а егда будутъ въ совершенѣ возрастѣ, добрые люди, съ радостію и съ благодареніемъ, женятъ сыновей своихъ по своей верстѣ, по суду Божію; а дщери, за ихъ дѣти, замужъ выдаютъ. И аще отъ таковыхъ, которое чадо Богъ возьметъ, въ покаяніи и съ причастіемъ; то отъ родителю безскверная жертва къ Богу приносится, и въ вѣчныя кровы вселяются; а имѣютъ дерзновеніе у Бога милости просити, и оставленія грѣховъ и о родителѣхъ своихъ.

16. Како чадъ воспитати; съ надѣлкомъ замужъ выдати.

А у кого дочь родится, ино разсудны люди отъ всякаго приплода на́ дочерь откладываютъ, на ее имя, или животи́нку роститъ съ припло́домъ; а у полотенъ и у вусчинъ, и у ширинокъ, и у вубру́совъ и руба́шекъ, по вся годы ей въ пришенной сундукъ кладутъ: и пла́тье, и саже́нье, н мони́сто, и святость, и суды оловяньте и мѣденые и деревяные; прибавливати не-по-мно́жку всегда, а не вдругъ: себѣ не въ доса́ду, а всево будетъ по́лно. Ино дочери растутъ, а страху Божію и вѣжству учатся: а приданое съ ними вдругъ прибываетъ; и какъ за мужъ сговорятъ, ино все готово. А толко ранѣе хто о дѣтехъ не смышля́етъ, да какъ за́ мужъ давать, и въ ту пору все покупать: ино скорая женитва видомая работа. А по судбамъ Божіимъ толко та дочь преставится, ино ее надѣлкомъ поминаютъ: по ей души сорокоустъ, и милостыню изъ того даютъ. А толко иныя дочери есть: такожъ о нихъ промышляти.

17. Како дѣти учити и страхомъ спасати.

Казни сына своего отъ юности его, и покоитъ тя на старость твою, и дастъ красоту душѣ твоей. И не ослабляй, бія младенца: аще бо жезломъ біеши его, не умретъ, но здравѣе будетъ, ты бо, бія его по тѣлу, а душу его избавляеши отъ смерти. Дщерь ли имаши: положи на нихъ грозу свою, соблюдеши я отъ тѣлесныхъ: да не посрамиши лица своего, да въ послушаніи ходитъ; да не свою волю пріимши, и въ неразуміи сотворится знаемъ твоимъ въ посмѣхъ, и посрамятъ тя предъ множествомъ народа; аще бо отдаси дщерь свою безъ порока, то яко велико дѣло совершиши, и посреди собора похвалишися; при концы́ не постонеши на ню.

Любя же сына своего, учащай ему раны, да послѣди о немъ возвеселишися. Казни сына своего измлада, и порадуешися о немъ въ мужествѣ: и посреди злыхъ похвалишися, и зависть пріимутъ враги твои. Воспитай дѣтище съ прещеніемъ, и обрящеши о немъ покой и благословеніе. Не смѣйся къ нему, игры творя: въ малѣ бо ся ослабиши, въ велицѣ поболиши, скорбя; и послѣ же яко оскомины твориши душѣ твоей. И не дажь ему власти во юности, но сокруши ему ребра, донележе растетъ, а, ожесточавъ, не повинетъ ти ся; и будетъ ти досаженіе, и болѣзнь души, и тщета домови, погибель имѣнію, и укоризна отъ сусѣдъ, посмѣхъ предъ враги, предъ властію платежъ и досада зла.

18. Како дѣтемъ отца и мати любити, и беречи, и повиноватися имъ, и покоити ихъ во всемъ.

Ча́да, послушайте заповѣди Господни: любите отца своего и матерь свою, и послушайте ихъ, и повинуйтеся имъ, по́ Бозѣ, во всемъ; и старость ихъ чтите; и немощь ихъ, и скорбь всякую, отъ всея душа, понесите на своей выи: и благо вамъ будетъ, и долголѣтны будете на земли: симъ очистите грѣхи своя, и отъ Бога помиловани будете, и прославитеся отъ человѣкъ, и домъ его будетъ благословенъ въ вѣки, и наслѣдитъ сыны сыновъ твоихъ и достигнетъ старости маститы, во всякомъ благоденьствѣ дни своя препровожаютъ. Аще ли кто злословитъ, или́ оскорбляетъ роди́теля своя, или клене́тъ или́ ла́етъ: сіи предъ Богомъ грѣшенъ, отъ наро́да проклятъ. Аще кто біетъ отца и матерь, отъ церкви, и отъ всякія святыни, да отлучи́тся, и лютою смертію и градцкою казнью да умретъ. Писано бо есть: Отча клятва иссушитъ, а матерня искоренитъ. Сынъ или дщерь не послушливы отцу или́ матери, въ пагубу имъ будетъ; и не поживутъ дней своихъ, иже прогнѣваютъ отца и досажа́ютъ матери; мнится не согрѣшая къ Богу, и есть поганого горѣе, и обѣщникъ есть нечестивымъ, о нихъ же Пророкъ Исаія рече: возмется нечестивый, да не видитъ славы Господня. Сихъ нечестивыи именова иже безчествуютъ роди́теля своя́. И паки насмѣхающагося отцу, и укоряюща старость матерню, да ськлюютъ и́ вра́нове, и снѣдятъ о́рли. Честь же творяй отцу и матери, и повинующеся имъ, по Бозѣ, во всѣмъ, возвеселитися имутъ о чадѣхъ своихъ, и въ день печали избавитъ ихъ Господь Богъ, и молитву ихъ услы́шитъ; его же просятъ подастъ имъ, вся благая. Покояй матерь свою волю Божію творитъ, и угожаяй отцу во благихъ поживетъ. Вы же, чада, дѣломъ и словомъ угожайте родителемъ своимъ во всякомъ блазѣ совѣтѣ, да благословени будете отъ нихъ. Отчее благословеніе домъ утвердитъ, и матерьня молитва отъ напасти избавитъ. Аще ли оскудѣютъ разумомъ, въ старости, отецъ или мать, не безчествуйте ихъ, ни укаряйте, да отъ своихъ чадъ почтени будете. Не забывайте труда матерня и отцова, яже о васъ болезноваша, и печални быша; покойте старость ихъ, и о нихъ болѣзнуйте, яко же они о васъ. Не глаголи: много сотворихъ имъ добра, одѣянимъ и пищею и всякими потребами; бо ни си́ свободи симъ: не можеши бо ею родити, и тако ею болѣти, яко она о тебѣ. Тѣмъ же со́ страхомъ, раболѣпно, служити имъ, да и сами отъ Бога мзду пріимете, и жизнь вѣчную наслѣдите: яко свершители заповѣди Его.

19. Како всякому человѣку рукодѣльничати, и всякое дѣло дѣлати, благословяся.

Въ домовитомъ обиходѣ и вездѣ, всякому человѣку, государю или государынѣ, или сыну или дщери, или служкѣ мужеска полу и женска, и всякому мастеровому человѣку, и стару и малу, всякое дѣло начати или рукодѣльничати, или ѣсти или пити, или ѣства варити, или печи что, и всякіе приспѣхи дѣлати, и всякое рукодѣліе и всякое мастерство, и устроивъ себя, очистивъ отъ всякія скверны, и руки умывъ чисто, прежде святымъ поклонятися трижды въ землю, а по нужѣ, ино до пояса; кто умѣетъ: „Достойно“ проговорити весь до конца, да благословясь у Настоящаго, да молитву Іисусову проговоря, да перекрестяся, молвя „Господи, благослови, отче“, тоже, начати всякое дѣло, ино тому Божія милость поспѣшествуетъ, ангелъ невидимо помогаютъ, а бѣсы отбѣгнутъ; и то дѣло Богу въ честь, а душѣ на пользу; и ѣсти и пити съ благодареніемъ, ино сладко; а что въ прокъ сдѣлано, ино мило. А дѣлати съ молитвою и съ доброю бесѣдою, или съ молчаніемъ: а дѣлаючи что нибудь, начнется слово праздное или хульное, или съ роптаніемъ, или смѣхи, или кощуны, или пѣсни бѣсовскія и игры: отъ такова дѣла, а отъ таковыя бесѣды, Божія милость отступитъ; ангели отъидутъ скорбни, и возрадуются нечестивіи демони, видя волю свою содѣвающу безумніи христіяне; и приступятъ ту лукавіи, влагающе въ мысль всякую злобу и всякую вражду, и ненависть, и подвизаютъ помыслы на гнѣвъ, и на всякіе кощуны, и сквернословіе, и на всякое зло. Ино то уже дѣло, ѣства или питіе, не споро, и всякое мастерство и всякое рукодѣліе не о Бозѣ совершается: Богу на гнѣвъ, а людямъ неблагословеное, непотребное, и не мило и не прочно; а ѣства и питіе не укусна и не сладка: только врагу и его слугамъ угодно, и сладко, и радостно. А кто въ ѣствѣ и питіи и во всякомъ рукодѣліи не чисто стряпаетъ, и во всякомъ мастерствѣ что украдетъ, или подмѣшаетъ, или подмѣнитъ что, или прилжетъ, или божится накривѣ: не только сдѣлано, или не въ толькѣ стало, — а онъ лжетъ, — и тѣ всѣ дѣла не угодны Богу, бѣси написуютъ; и въ томъ во всемъ человѣку истязану быти въ день страшнаго суда.

20. Похвала женамъ.

Аще даруетъ Богъ жену добру́, дражайши есть камени многоцѣннаго: таковая отъ добры корысти не лишится; дѣлаетъ мужу своему все благожитіе. Обрѣтши волну и ленъ, сотвори благопотре́бно рукама своима. Бысть яко корабль, куплю дѣющи, издале́че сбираетъ, въ себѣ, богатество. И востаетъ изъ нощи́; и дастъ брашно дому, и дѣло рабынямъ: отъ плода руку своею насадитъ тяжаніе много. Препоясавше крѣпко чресла́ своя́, утвердитъ мы́шца своя́ на дѣло. — И ча́да своя́ поучаетъ, такоже и рабъ и не угасаетъ свѣтилникъ ея всю нощь. Руцѣ свои простираетъ на полезная; локти же своя утвержаетъ на вретено́. Милость же простираетъ убо́гу. Плодъ же подаетъ нищимъ. Не печется о дому мужъ ея. Многоразлична одѣянія, преукрашена, сотвори мужу своему, и себѣ, и чадомъ и домочадцемъ своимъ. Всегда же мужь бысть въ соньмищи, съ вельможи, и сядетъ, — знаемымъ вельми честенъ бысть, и благоразумно бесѣдова, разумѣетъ яко добро дѣлати: никто же безъ труда вѣнчанъ будетъ. Жены ради добры блаженъ мужъ, и число дній его сугу́бо. Жена добра́ веселитъ мужа своего и лѣта его исполнитъ миромъ. Жена добра́: часть блага въ части боящихся Господа да будетъ. Жена бо, мужа своего честне творяще, первіе: Божію заповѣдь сохранивъ, благословена будетъ; а второе: отъ человѣкъ хва́лима есть. Жена добра и страдолюби́ва и молчали́ва, вѣнецъ есть мужеви своему́: обрѣте мужь жену свою добру́, износитъ благая изъ дому своего. Блаженъ есть таковыя жены мужь: и лѣта своя исполняютъ во блазѣ мирѣ. О добрѣ женѣ хвала́ мужу и честь

21. Наказъ мужу и женѣ и людемъ и дѣтемъ: како лѣпо быти имъ.

Да самому себѣ, государю, и жену и дѣтей и домочадцовъ своихъ учити: не красти, не солгати, не оклеветати, не завидѣти. Не обидѣти, не клепати, чюжаго не претися; не осужатися, не бражничати, не просмѣивати, не номнити зла, не гнѣватися ни на кого, къ большимъ быти послушну и покорну; къ среднимъ любовну; къ меньшимъ и убогимъ привѣтну н милостиву; со всякимъ управа безъ волокиты; но и паче: наймита наймомъ не изобидѣти; а всякая обида со благодареніемъ терпѣти, Бога ради, и поносъ и укоризна; аще по дѣломъ поносятъ и укоряютъ, сіе съ любовію пріимати, и отъ таковаго безумія отвращатися, а противъ не мстити; аще въ чемъ не повиненъ, за сіе отъ Бога мзду пріимеши. А домочадцевъ своихъ учи страху Божію и всякой добродѣтели: и самъ тая же твори; и вкупѣ отъ Бога обрящете милость. Аще ли небреженіемъ и нерадѣніемъ, самъ, или жена мужнимъ ненаказаніемъ, согрѣшитъ, или что злотворитъ; и вси домочадцы: мужи и жены и дѣти, господаревымъ не наказаніемъ, каковъ грѣхъ, или что зло сотворятъ, или брань, или татьбу, всѣ вкупѣ по дѣломъ своимъ пріимутъ, злосотворшіи муку вѣчную, а добросотворшіе, богоугодно поживше, жизнь вѣчную наслѣдятъ въ Царствіи Небесномъ. А себѣ большій вѣнецъ пріимеши, понеже не о себѣ единомъ попеченіе имѣя къ Богу, но и сущихъ съ собою введе въ жизнь вѣчную.

22. Каковы люди дерьжать и какъ о нихъ промышлять: во всякомъ ученіи, и въ божественныхъ заповѣдяхъ и въ домовномъ строеніи.

А людей у себя добрыхъ дворовыхъ держати, чтобы были рукодѣлны: кто чему достоинъ и какому рукодѣлію ученъ. Не воръ бы, не бражникъ, не зерьщикъ, не тать, не разбойникъ, не чародѣй, не корчми́тъ, не оманьщикъ. Всякой бы человѣкъ у добраго государя наученъ страху Божію, и вѣжьству, и смиренью, и всякимъ добродѣтеленъ; доброму промыслу, не солгалъ, ни разбилъ, никово бы не обидѣлъ; сытъ бы былъ государевымъ жалованьемъ, да одѣнъ или своимъ рукодѣліемъ. А чѣмъ государь пожалуетъ: платьемъ, или лошедь, и всякимъ нарядцомъ, или нашенькою, или какою торговлею, а и самъ что замыслитъ своими труды, ино лучшее платенко верьхнее и нижнее, и рубашка и сапогъ, — блюсти по праздникомъ и при добрыхъ людехъ, въ ве́дро, а всегды бы было чистенко, и не изва́ляно, и не изгрязнено, и не излито, и не измочено, и не измято.

А который человѣкъ глупъ и грубъ и невѣжда, и не бреженъ, а и есть у нево платенко́, государьско жалованье, или своими труды сдѣлано, да беречи не умѣетъ, ино государю, или кому приказано, у такихъ нечювьствениковъ платье берегутъ у себя лучшее; дадутъ коли во́ время надѣть, да опять, снемше, у себя блюдутъ. А всѣмъ дворовымъ лю́демъ наказъ: всегда, што дѣлаютъ, въ ветшаномъ платьѣ, а какъ предъ государемъ, и при людехъ, въ чистомъ повседневномъ пла́тейцѣ; а въ праздники, и при добрыхъ людехъ, или съ государемъ, или съ государынею гдѣ быти: ино въ лучшемъ платьѣ; а беречи отъ грязи, и отъ дожжа́ и отъ снѣгу; и пришедъ, да снявъ платейце, высушить и вымять, и вытерьть и выпахать; хорошенко укласть и упрятать: гдѣ то живетъ. Ино и себѣ мило, и отъ людей чесно, и государю спо́ро, и слу́шкамъ про́чно, и всегды вновѣ. А люди бъ были во чти́, и въ грозѣ и во всякомъ дозо́рѣ. Промежъ бы себя не кра́лися; чюжево бы отнюдь не хотѣли ни кои́ми дѣла, а государьского бы берегли́, все за одинъ; а государю бы и государыни не лгали, и не клеветали ни на кого ни въ чемъ. А государи бы тѣмъ не потакали, обыскивали бы прямо: ставя съ оче́й на́ очи; дурному бы не попущали, а доброго бы жаловали: ино всякъ добру ревнуетъ, и государьское жа́лованья хочетъ выслужить правдою и прямою своею службою; и государьскимъ наказомъ и добрымъ нау́комъ вѣкъ живетъ; и душу спасетъ: и государю служитъ и Богу угодитъ. Да наипаче указывати, которымъ вмѣстно, къ церкви Божіи всегда ходити, и по праздникомъ; или во дворѣ пѣтья слушати, и, особъ, наединѣ, молитися; чистота тѣлесная хранити отъ всякаго пьянства и лакомства и отъ безвременнаго питія и ѣствы; и объяденія и піянства воздержатися; и отцовъ бы духовныхъ, и съ женами своими, имѣти; и на покаянія приходили. А женатые съ своими жена́ми законно бы жили, по духовнаго отца наказанію. Да чему самъ отъ государя наученъ, тово бы и жены наказывали: всякому страху Божію и вѣжству; и государыни бы слушали, и новиновалися во всемъ; и своими труды и рукодѣльемъ выслуживалася, а не крала бы, и не лга́ла, и не бра́жничала, и съ дурными рѣчми къ государынѣ не приходила; и волхвовъ, и съ кореньемъ и съ зельемъ, кто тѣмъ промышляетъ, съ тѣми бы отнюдь не зналася, и государемъ бы про такихъ людей не сказывали: то бо суть слуги бѣсовскіе; служили бы государемъ своимъ вѣрою и правдою, и добрыми дѣлы, и праведными труды. — А государи бы, и государыни, людей своихъ: мужей и женъ и ребятъ, и всякихъ слугъ, жаловали, и кормили и поили, и одѣвали; и въ теплѣ бы жили, и во всякомъ поко́и и въ благоденьствѣ всегда. И государи бы, себя и свою душу, и домъ свой, до́бре строивъ, и домочадцовъ безо всякія скорби, — тоже нищихъ и странныхъ и убогихъ, вдовицъ и сиротъ, покоити достойно, отъ своихъ праведныхъ трудовъ. И къ церквамъ Божіимъ и церковникомъ, и въ монастыри, приносити милостыня, и къ себѣ, въ домы своя, призывати: ино то и Богу пріятно и души нолезно. А отнюдь бы не вмѣщалося въ домъ ни отъ насилія, ни отъ грабленія, или отъ всякого мшелоимства ни отъ посулу, ни отъ поклепу, ни отъ резо́имства, ни отъ я́бедничества, ни отъ крива-суда́. Аще отъ сего зла Богъ соблюдетъ, тотъ домъ будетъ благословенъ отъ нынѣ и до вѣка.

23. Како врачеватися христіяномъ отъ болѣзни и отъ всякихъ скорбей.

Аще Богъ пошлетъ на кого болѣзнь или какую скорбь, ино врачеватися Божіею милостію, да слезами, да молитвою, да постомъ, да милостынею къ нищимъ, да истиннымъ покаяніемъ. Да благодареніе и прощеніе, и милосердіе, и нелицемѣрная любовь ко всякому. Да отцовъ духовныхъ подвизати на моленіе Богу; и молебны пѣти, и вода святити съ честныхъ крестовъ и со святыхъ мощей, и съ чудотворныхъ образовъ, и масломъ свящатися; да и по чудотворнымъ и по святымъ мѣстомъ обѣщеватися, и приходяще, молитися, со всякою чистою совѣстію; тѣмъ цѣлба всякимъ различнымъ недугомъ отъ Бога получити, да и отъ всякихъ грѣховъ удалятися и впереди никакого зла не творити, а отцовъ духовныхъ заповѣди хранити, и епитемьи исправляти: тѣмъ очиститися отъ грѣха, и душевная и тѣлесная болѣзнь исцѣлити, и Бога милостива сотворити… А кто безстрашенъ и безчиненъ, страху Божія не имѣетъ и воли Божіи не творитъ, и закону христіанскаго и отеческаго преданія не хранитъ, о церкви Божіи и о церковномъ пѣніи, и о келейномъ правилѣ, и о молитвѣ, и о всякомъ славословіи Божіи не радитъ; ѣстъ и піетъ безъ воздержанія, и во объяденіе и въ піянство, и не въ подобно время, и законнаго жительства не хранитъ… и всяко скаредіе творятъ, и всякія богомерзскія дѣла:… пѣсни бѣсовскія, плясаніе, скаканіе, гудѣніе, бубны, трубы, сопѣли, медвѣди, и птицы, и собаки ловчія; творящая конская уристанія, всяко бѣсовское угодіе, и всякое безчиніе и безстрашіе; къ сему жъ чарованіе и волхованіе: и наузы, звѣздочетье, рафли, альнамахи, чернокнижье, ворограи, шестокрылъ, стрѣлки громныя, топорки, усовники, дна каменія, кости волшебныя; и иныя всякія козни бѣсовскія, или кто чародѣйствомъ и зеліемъ, и кореніемъ, и травами, на смерть, или на потворство окормляетъ, или бѣсовскими словами и мечтаньми и кудесомъ, чаруетъ на всякое зло или кто клянется именемъ Божіимъ во лжу или клевещетъ на друга: тутожъ прочти и 24 главу: въ тѣхъ во всѣхъ дѣлехъ и въ обычаехъ и нравехъ возстаетъ въ человѣцѣхъ гордость, ненависть, злопомняніе, гнѣвъ, вражда, обида и всякая злая дѣла.

24. О неправедномъ житіи.

А кто не по Бозѣ живетъ, не по христіянскому житію, чинитъ всякую неправду и насиліе и обиду: сильно отойметъ, возьмя не заплатитъ, волокитою уморитъ, а молода человѣка во всемъ изобидитъ; а на сусѣдствѣ кто не добръ, или въ селѣ, на своихъ христіанъ, или на приказѣ, или на власти, дани тяжкія и всякіе уроки незаконные накладываетъ: или чужую ниву попахалъ, или лѣсъ посѣкъ, или землю переоралъ, или лугъ перекосилъ, или ловлю рыбную переловилъ, или борти, или перевѣсье и всякую ловлю, и всякое угодье неправдою и насиліемъ сотворитъ; или ограбитъ, или покрадетъ, или разобьетъ на дорозѣ, и на стану грабитъ, и бьетъ и соромитъ, и пустошитъ луга, пашню толочитъ, и всякую обиду чинитъ, или кого чимъ поклеплетъ, или кого чимъ подкинетъ, или чимъ оклевещетъ и ополичнитъ; или напрасно кого продастъ; или въ работу, неповинныхъ лукавствомъ или насиліемъ охолопитъ; или не прямо судитъ или неправедно обыскиваетъ, или накривѣ послушествуетъ, или кающимся не милостивъ; или лошадь или всякую животину и всякое стяжаніе, и селы или винограды, варницы, мельницы, лавки, амбары, или дворы и всякое угодье, силою отыметъ, или дешево, въ неволю купитъ, или ябедничествомъ вытяжетъ, или корчемнымъ прикупомъ или лихвы, и всякимъ лукавнымъ ухищреніемъ и неправеднымъ собраніемъ, или росты и насыпы, и мыта́ богатѣетъ… всякія неподобныя дѣла творитъ:… самъ государь, или государыня, творятъ, или дѣти ихъ, или люди ихъ, или крестьяне ихъ, а они государи о томъ не возбраняютъ, и не обороняютъ, и управы не даютъ: прямо, всѣ вкупѣ, будутъ во адѣ, а здѣ прокляти.

25. О праведномъ житіи.

Аще кто по Бозѣ живетъ и по заповѣдемъ Господнимъ, и по отческому преданію и по христіяньскому закону, — аще ли властелинъ: судитъ праведно и нелицемѣрно, всѣмъ равно, богату и убогу, и ближнему и дальнему, доволни будутъ уроки праведными и творити. Аще ли въ селѣхъ, такоже и во градѣ, и на сосѣдьствѣ кто добръ и у своихъ христіанъ; или на власти, или на приказѣ: праведные уроки, въ подобно время, емлетъ; не силою, и не грабленіемъ и не мученіемъ; а коли что не радилося, а заплатити нечимъ, — и онъ наровитъ, а у сусѣда, или у своево христіанина чево не достало: на семена; или лошади или коровы нѣтъ, или государьскія дани нечимъ заплатить, ино ево ссудити и подмочи; а у самого мало: ино занята; а о нихъ болѣзновати отъ всея душа, а ото всякаго обидящаго беречи ихъ въ правдѣ. А самому отнюдь никово ни въ чемъ не обидѣти: ни въ пашнѣ, ни въ землѣ, ни въ домашнемъ ни въ какомъ запасѣ, ни въ животинѣ; и всякаго неправеднаго стяжанія не желати: благословеными пло́ды и праведнымъ стяжаніемъ жити подобаетъ всякому христіанину. И видя Богъ ваша добрая дѣла, и такову милость и нелицемѣрную любовь ко всѣмъ, и правду во всемъ, и подастъ Богъ богатую милость и гобину плодомъ; и всякаго изобилія умножитъ. И милостыня та отъ праведныхъ трудовъ, и Богу пріятна; и молитву ихъ Богъ услышитъ, и отъ грѣховъ свободитъ и жизнь вѣчную даруетъ.

26. Како жити человѣку смѣтя свой животъ.

А во своемъ во всякомъ обиходѣ, и въ лавочномъ и во всякомъ товарѣ, и въ казнѣ и въ полатахъ, или въ дворовомъ во всякомъ запасѣ, или въ деревенскомъ, или въ рукодѣліи, и въ приходѣ и въ расходѣ, и въ займѣхъ и въ долгѣхъ, всегда себѣ смѣчать; и потому живешь, и обиходъ держишь: по приходу и расходъ.

27. Аще кто не разсудя себя живетъ.

Всякому человѣку, богату и убогу, велику и малу, разсудити себя и смѣтити, по промыслу и по добытку и по своему имѣнію; а приказному человѣку смѣтя себя по государьскому жалованью, и по доходу и по помѣстью, и таковъ дворъ себѣ держати, и всякое стяжаніе и всякой запасъ; по тому и люди держати и всякой обиходъ: по промыслу и по добытку, по тому и ѣсти и пити, и носити, и людей одѣвати, и съ людми сходитися съ добрыми. Аще кто не разсудя себя и не смѣтя своего житія и промысла и добытка, и учнетъ, на́ люди глядя, жити не по силѣ, и займуя, или неправеднымъ имѣніемъ, — и та честь будетъ съ великимъ бесчестіемъ, и со укоризною и съ поношеніемъ. Въ злое время никто ему не поможетъ, а отъ Бога грѣхъ, а отъ людей, посмѣхъ. Ино надобѣ всякому человѣку тщеславія бѣгати и похвалы, и неправеднаго собранія; жити по силѣ и по промыслу, и по смѣтѣ и по добытку, своею правою силою. Ино то житіе благопріятно и богоугодно, и отъ людей похвално; и себѣ и дѣтемъ своимъ прочно.

28. Аще кто слугъ держитъ.

А только людей держатъ у себя не по силѣ и не по добыткамъ, а не удоволити его ѣствою и питіемъ и оде́жею, или которой не рукодѣленъ, и собою не умѣетъ промыслити: ино тои слуги, мужику или женки или дѣвки, у неволи, заплакавъ, и лгать и красть, а мужикомъ и розбивать и красть; и въ корчмѣ пити; и всякое зло чинити. И тому безумному государю и государынѣ отъ Бога грѣхъ, а отъ людей посьмѣхъ; и не сусѣдьство со всякимъ; а отъ сусѣдей продажа, и тщета дому; и самъ оскудѣетъ за скудость ума.

29. Како поучати мужу своя жена.

Подобаетъ поучити мужемъ женъ своихъ съ любовію и благоразсуднымъ наказаніемъ; жены мужей своихъ вопрошаютъ о всякомъ благочиніи: како душа спасти, Богу и мужу угодити; и домъ свой добрѣ строитн; и во всемъ ему покорятися; и что мужъ накажетъ, то съ любовію пріимати и со страхомъ внимати, и творити по его наказанію. Первѣе: имѣти страхъ Божій, и телѣсная чистота, якоже впереди указано бысть. Возставъ отъ ложа своего, и молебная совершивъ, женамъ и дѣвкамъ, и слугамъ дѣло указати дневное всякому рукодѣлію, и что работы: дневная ѣства варити, и которые, хлѣбы печи: ситные и рѣшетные; и сама бы знала, какъ мука сняти, какъ квашня притворити и замѣсити, и хлѣбы валяти и печи, и квасны и бухоны; а калачи и пироги такоже, и колько муки возьмутъ, и колько испекутъ. И колько чего родится изъ четверти, или изъ осьмины, или изъ рѣшета, и колько высѣвковъ и колько испекутъ: мѣра знати во всемъ, а ѣству мясную и рыбную, и всякіе пироги, и всякіе блины, и всякія каши, и кисели, и всякіе приспѣхи печи и варити, все бы сама государыня умѣла: ино умѣетъ и слугъ научити, и все сама знаетъ. А коли хлѣбы печи, тогда и платье мыти: ино съ одного стряпня, и дровамъ не убыточно: и дозирати, какъ красныя рубахи моютъ и лучшее платье; и колько мыла идетъ и золы, и на колько рубашекъ; и хорошо бы вымыти и выпарити, и начисто выполоскати, и изсушити и искатати, и скатерти и убрусы, и ширинки, и утиральники такоже; и всему тому счетъ самой знати, и отдати и взяти сполна, и бѣло и чисто. А ветчано вѣжливо бы поплачено; ино сироткамъ пригодится. А коли хлѣбы пекутъ, ино того же тѣста велѣти отняти, и пироговъ начинити; а коли пшеничное пекутъ, и семьѣ изъ межситки велѣти пироговъ сдѣлати въ скоромные дни со скоромною начинкою, какая лучится, а въ постные дни съ кашею, или съ горохомъ, или съ сокомъ; или рѣпа, или грибы, или рыжики, или капуста: что Богъ лучитъ: ино семьѣ потѣшенье. И всякую бы ѣству, и мясную и рыбную, и всякій приспѣхъ, скоромный и постный, жена сама бы знала и умѣла сдѣлать, и служку научить. То государыни домовныя и домоводицы добрыя. И то бы знала же пивной, медовый и винный, и бражный, квасной, и уксусный, и кислоштяный, и всякій обиходъ какъ дѣлаютъ, и поваренный и хлѣбный; и въ чемъ что родится, и колько изъ чего будетъ. Коли все знаетъ добрая жена добраго мужа, мужнимъ наказаніемъ и грозою, и своимъ добрымъ разумомъ и наукомъ, ино все будетъ споро, и всего будетъ полно. А которая женщина или дѣвка рукодѣльна, и той дѣла указати; рубашка дѣлати, или убрусъ брати, или поставъ ткати, или золотное или шолковое, пяличное дѣло; и которая чему учена, того всего досмотрити и дозрѣти, и всякой мастери самой прядено, и тафта, и камка, и золото и серебро отвѣсити, и отмѣрити, и смѣтити, и указати, сколько чего надобно, и сколько чего дастъ; и прикроити, и примѣрити; самой все свое рукодѣліе знати… А сама бы государыня, отнюдь никакоже, нѣкоторыми дѣлы, опрично немощи, или по мужней волѣ, или но нужѣ, николи безъ дѣла не была, ино и служкамъ, на нее смотря, повадно дѣлати. Мужъ ли придетъ, гостья ли обычная придетъ, всегда бы надъ рукодѣліемъ сидѣла сама: то ей честь и слава, и мужу похвала; а николи же бы слуги государыни не будили: государыня бы сама слугъ будила.

30. Добрыя жены рукодѣльныя плоды и береженье всему.

А добрая домовитая жена, благоразумнымъ своимъ помысломъ и мужнимъ наказаніемъ, и добрымъ подвигомъ своихъ трудовъ, съ служками, полотенъ и узчинъ, и холстовъ надѣлано; да на что пригоже, ино окрашено на лѣтники, и на кафтаны, и на сарафаны, и на терлики, и на шубы поволоки, и то у ней на домашній обиходъ перекраено и перешито; а будетъ съ лишкомъ за обиходомъ надѣлано полотенъ, или узчинъ, или холстовъ, или скатертей, или убрусовъ, или ширинокъ, или инаго чего, ино и продастъ; ино что надобѣ купитъ: ино того у мужа не проситъ. А рубашки, то все самой кроити или дати при себѣ кроити; и всякіе остатки и обрѣзки: комчатые и тафтяные, и дорогіе и дешевые, и золотное и шелковое, и бѣлое и красное, и пухъ, и торочки, и спорки, и новые и ветшаные, все бы было прибрано; мелкое въ мѣшечкахъ, а остатки сверчено и связано; и все разобрано, по числу, и упрятано, и какъ чего подѣлать ветшана, или у новаго не достало: а то все есть въ запасѣ, въ торгу того не ищешь, далъ Богъ: у добраго промысла, у совершеннаго разума, все ся лучило дома.

31. Какъ всякое платье кроити и остатки и обрѣзки беречи.

Въ домовитомъ обиходѣ коли лучится какое платье кроити себѣ, или женѣ, или дѣтемъ, или людемъ: камчато, или тафтяно или изуфрено или кушачно, или сукняное, или армячное, или сермяжное, или кожи какія кроити; или сагадакъ, или на сѣдло́, или омѣтюкъ или сумы или сапоги, или шуба или кафтанъ, или терли́къ, или однорятка, или кортель, или лѣтникъ и каптуръ, или шапка, или нагавицы, или какое платно ни буди; и самъ государь или государыня смотритъ и смеча́етъ: остатки и обрѣзки живутъ; и тѣ остатки и обрѣзки ко всему пригожаютца въ домовитомъ дѣлѣ: поплатить ветчаново, тово жъ портища, или къ новому прибавитъ, или какое нибуди починить; а остатокъ, или обрѣзокъ, какъ выручитъ; а въ торгу́ устанешь прибираючи въ то лицо: въ три дорога купишь, а иногда и не приберешь. А коли лучится какое платно кроити мо́лоду человѣку, сыну или дщери; или молодой невѣскѣ лѣтникъ или кортель, или шуба съ поволокою; или опашень зуфрянъ, или камчатъ, или обьяръ, или отла́съ, или бархатъ или терли́къ или кафтанъ, и что нибуди доброе, и, кроячи, да загибати вершка по два и по три на подолѣ, и по краемъ, и по швамъ, и по рукавомъ; и какъ вырастетъ, годы два или три, или въ четыре, — и распоровъ по платно, и загнутое отправитъ опять платно, хорошо станетъ. Кое́ платье не всегда носити, то такъ раити.

32. Всякая порядня домашняя держати.

А всякому рукодѣлью и у мужа и у жены всякая бы порядня и снасть была въ подворьи: и плотницкая и портново мастера, и желѣзная и сапожная; и у жены бы, всякому ей рукодѣлью и домовитому обихо́ду всякая бы была порядня своя; и держа́но бы то бережно, гдѣ что пригоже. Ино что себѣ ни сдѣлалъ, и никто́ ничево не слыхалъ. Въ чюжій дворъ не идешь ни по́што: свое безъ слова. А пова́ренная порядня и хлѣбная, а все бы было у себя сполна: и мѣдяное, и оловяно́е, и желѣзное, и деревяно́е, каково ся лучитъ. А лучится у кого какая ссуда взять, или свое дать: саженье, или мониста, или скута женьня; судно серебряное, или мѣдяно, или оловяное, или какое платно́, и какой ни буди запа́съ, пересмотри́ти, и нового и ветшаного, гдѣ измято, или избито, или утло, или гато гдѣ изва́ляно, или подрался, и которая на че́мъ ни буди притча, или што не цѣло: и все то исчести, и смѣтити, и записати; — и кто емлетъ, и кто даетъ, обѣма то бы было вѣдомо; а что вѣсовое, то бы извѣшено, и всякой ссуды бы цѣна поста́влена. По грѣхомъ какова́ притча ста́нетца: ино на обѣ стороны хлопото́въ и остуды нѣтъ; ино тому́ платежъ. А всякая ссуда има́ти и дава́ти въ честь, и беречи паче своего и отнести на срокъ: чтобы сами государи того не просили, и по то не посылали: ино и впредь дадутъ, и дружба впрокъ. А только чюжаго не беречи или на срокъ не отнести, или испортивъ отдать, — оно остуда въ вѣкъ; и убытокъ въ томъ, и прода́жа живетъ и впередъ никто ни въ чемъ не вѣритъ.

33. По вся государыни дни дозирати у слугъ всего: и домашней порядни, и рукодѣлья, и о самой ей, и о всякомъ береженіи и строеніи.

А по вся дни государыня у слугъ дозираетъ, которые пекутъ и варя́тъ и вся́кіе приспѣхи дѣлаютъ, и которые всякое рукодѣлье дѣлаютъ. И которая служька хорошо дѣлаетъ по приказу: и ѣсть варитъ, или хлѣбы печетъ, или колачи или́ пироги́, или какіе нибудь приспѣхи, или́ какое рукодѣліе сдѣлаетъ хорошо́: и за то слушка примо́лвити и пожаловати, и есть подати, и по прежеписанному: какъ дворовымъ людемъ отъ государя береженіе, и по службѣ смотря. А кто́ худо и не по приказу сдѣлаетъ, или не слушаетъ, или лѣнитца, или испо́ртитъ што, или нечи́сто стряпаетъ, или крадетъ: ино, по прежепи́санному наказаніе учити, — какъ отъ государя слугамъ живетъ; впереди о томъ наказаніи писано: какъ кого пожаловати или наказати, или научити. А въ горницѣ и въ комнатѣ, и въ сѣнѣхъ, и на крыльцѣ, и на лѣсницѣ, всегда бы было чисто, и рано и позно. А столъ и суды всякіе всегда чисто мыти, и скатерть чиста́; и сама бы государыня всегда была устроина во всякомъ обиходѣ: таковыи бо у нее́ служки были вѣжливы, по прежеписанному. А съ слугами бы государыня пустотныхъ рѣчей ни пересмѣшныхъ, отнюдь не говорила. Ни торговки, ни бездѣлныя же́нки ни волхвы, ни како не приходили; понеже отъ тѣхъ много зла чинится; слугамъ потворъ; аще въ кой домъ начнутъ сицевые приходити, а государыня о сицевыхъ слугъ своихъ не возбраняетъ, а и сама ихъ начнетъ привѣчати, — первое: учинитъ слугъ крадливыхъ, потомъ и блудливыхъ. Аще ли и сама государыня не уцѣломудрится и не отженетъ ихъ, — съ сицевыми горе ей самой! Нынѣ же оставимъ о таковыхъ, но преди пойдемъ а постеля и платья по гряткамъ, и въ сундукѣхъ и въ коробьяхъ; и убрусы и рубашки и ширинки, все бы было хорошенко, и чистенько, и бѣленко, уверчено и укла́дяно, и не перемято и не сполщено; а саженье и мониста и лучшее платья всегда бы было въ сундукѣхъ и въ коробьяхъ, за замкомъ, а ключи бы держала въ маломъ ларцѣ; а все бы вела сама.

34. По вся дни женѣ съ мужемъ о всемъ спрашиватися и совѣтовати о всемъ.

А по вся бы дни у мужа жена спрашивалась и совѣтовала о всякомъ обиходѣ, и воспоминала, что надобѣтъ. А въ гости ходити, и къ себѣ звати: ссылаться, съ кѣмъ велитъ мужъ; а гостьѣ коли лучится, или самой гдѣ быти за столомъ сѣсти, лучшее платье перемѣнити; отнюдь беречися женѣ отъ пьянаго питія; пьяный мужъ дурно, а жена пьяна въ міру не пригоже. А съ гостьями бесѣдоватно рукодѣльѣ и о домашнемъ строеніи: какъ порядня вести, и какое рукодѣлейце дѣлати… Или, у себя въ подворьѣ, у которой гостьи, услышитъ добрую пословицу: какъ добрыя жены живутъ, и какъ порядню ведутъ, и какъ домъ строятъ, и какъ дѣти и служокъ учатъ, и какъ мужей своихъ слушаютъ, и какъ съ ними спрашиваются, и какъ повинуются имъ во всемъ; и то въ себѣ внимати; а чего добраго не знаетъ, ино сирашиватися вѣжливо. Съ такими-то добрыми женами пригоже сходитися: ни ѣствы, ни питія для, добрыя ради бесѣды и науку для; да внимать то въ прокъ себѣ, а не пересмѣхатися, и ни о комъ не переговаривати; и спросятъ о чемъ про кого иногда, и учнутъ ума пытати; ино отвѣщати: „Не вѣдаю азъ ничего того, и не слыхала, и не знаю; и сама о ненадобномъ не спрашиваю; ни о княшняхъ, ни о боярыняхъ, ни о сусѣдахъ не пересужаю“.

35. Како слугъ наказывати.

А слугъ своихъ заповѣдывай: о людѣхъ не переговаривати; и гдѣ въ людѣхъ были и что видѣли недобро, — того дома не сказывали бы; а что дома дѣется, того бы въ людѣхъ не сказывали: о чемъ послано, то и памятуй; и о иномъ о чемъ учнутъ спрашивати, того не отвѣчивай, и не вѣдай, и не знай того: борзѣе отдѣлавшися, да домой ходи, да то государю скажи, о чемъ посланъ, а иныхъ вѣстей не приноси, что не приказано; ино про межъ государей никакой ссоры, ни остуды не будетъ… А пошлешь куда служку, или сына, и что накажешь говорити, или что сдѣлати, или что купити, — и ты вороти, да спроси ему: что ты ему наказалъ: что ему говорити, или что ему сдѣлати, или что ему купити? — И только, по твоему наказу, тебѣ все изговоритъ, ино добро! А пошлешь со слугою къ кому ѣству или питье, или что-нибудь, да воротивъ, спроси его: куда несетъ? — Только какъ скажетъ, какъ наказано, то добро! А посылати питіе вполнѣ, а ѣству цѣлу: ино солгать не умѣть! А товаръ посылай смѣтивъ или смѣрявъ, а деньги счетши, а что вѣсовое, свѣсивъ; а всего лучше запечатавъ: ино безгрѣшно! Да о томъ наказывати: что съ нимъ послано, безъ государя отдатъ ли, или домовь отнести… А куда пошлютъ слугу въ добрые люди, у воротъ легонько поколотить; а по двору идешь, и кто спроситъ: „Какимъ дѣломъ идешь?“ — Ино того не сказывати, а отвѣчать: „Не къ тебѣ азъ посланъ: къ кому азъ посланъ, съ тѣмъ то и говорить“. А у сѣней, или у избы, или у кельи, и ноги грязныя отерти, носъ высморкати и да выкашлятися, да искусно молитва сотворити; а только „аминя“ не отдадутъ, ино и въ другое и въ третіе молитва сотворити, побольше перваго; а отвѣта не отдадутъ, ино легонько потолкатися; и, какъ впустятъ, и вшедъ, святымъ иконамъ поклоняться и отъ государя челобитье и посылка править; ино, въ ту пору, носа не копать перстомъ, ни кашлять, ни сморкать, ни харкати, ни плевати; аще ли нужно, отшедъ на сторону, устроиться; вѣжливенько стоять и на сторону не смотрить, да что наказано, то исправить; а о иномъ ни о чемъ не бесѣдовать, да борзѣе къ себѣ поити; да тотъ отвѣтъ государю сказать, о чемъ посыланъ. А гдѣ лучится быти у кого въ подворьѣ, или въ кельѣ, при государѣ или безъ государя, — ни какой вещи, ни доброй, ни худой, ни дорогой, ни дешевой, не ворошити, ни смотрѣти безъ прощенія; ни съ мѣста на мѣсто не переложити безъ повелѣнія; и съ собою возьмя, ничево не вынести безъ благословія; а ѣствы и питія такожъ не покушати, чего не велѣно: то татство и лакомство; кто на то дерзаетъ безъ благословенія и безъ велѣнія, тому ни въ чемъ не вѣрити, и за очи его никуда не пошлютъ, по Евангелію: вмалѣ бѣ вѣренъ, надъ многими тя поставлю.

36. Женамъ наказъ о пьяньствѣ и о пьяномъ питіи, и слугамъ такожъ; и о потаи не держати ничево нигдѣ; и слугъ лжи и клеветы не слушати безъ исправы какъ ихъ наказывати грозою, и жену тако же, и какъ въ гостехъ быти, и дома себя устроивати во всемъ.

А у жены бы отнюдь, ни како же, ни которыми дѣлы, піяное питье не было: ни випо, ни медъ, ни пиво, ни гостиньцы. Питіе бы было въ погребѣ да па ле́дникѣ. Пила бы безхмелную брагу и квасъ, и дома и въ людехъ. Аще пріидутъ отколѣ жены о здоровьи спросить, — тѣмъ питія пьянаго не давать; а свои женки и дѣвки не пили же бы, въ людехъ и дома, до пья́на. А женѣ, втаи мужа своего, не ѣсти и не пити; и похоронакъ на ѣству и на питье потаи мужа своего не держати. А у подругъ и у племя́ни, по́таи мужа своего, питья и ѣствъ, и сдѣлки н поми́нковъ всякихъ, не проситъ, и самой не дава́ть; а у себя чюже́во не держать безъ мужня вѣдома; о всемъ совѣтовати съ мужемъ, а не съ холопомъ и не съ рабою.

Отнюдь беречися отъ всякаго зла; а рабъ своихъ и рабынь ложьными словесы не обгова́ривати мужу своему, и на́сердки не держати; а кто что избродитъ, и то мужу сказати прямо, безъ прибавки. А мужу и женѣ отнюдь оговору не слу́шати никаково, и не вѣровати безъ обыску, безъ прямого. А женѣ къ мужу безлѣпицъ домашнихъ не доносити; чего сама не возможетъ управити, а которое дурное дѣло, то мужу сказати въ правду; а въ чемъ которая женка или дѣвка не слушаетъ, и слово и наказаніе не́иметъ ее, или какову пакость учинитъ, — о томъ о всемъ съ мужемъ переговорити, какое кому наказаніе учинити.

А го́стьи коли лучатся, и ихъ потчивати питіемъ, какъ пригожа: а самои пья́ново питія, хмелново, не пи́ти. А питіе и ѣству, и всякой обиходъ, приноситъ одинъ человѣкъ сверстной, кому приказано: а мужескъ полъ туто, и рано и поздно, отнюдь, ни какоже, ни какими дѣлы, не былъ бы; кромѣ того, кому приказано, сверстному человѣку, что принести или о чемъ спросити, или о чемъ ему приказати; и всего на немъ пыта́ти: и безчинія и невѣжества, а ино́му никому́ тута дѣла нѣтъ.

А завтракати мужу и женѣ отнюдь неприго́же, кромѣ немощи: ѣсти и пити въ подобно время.

37. Какъ платье всякое женѣ носити и устроити.

А платья, и рубашки, и убрусы на себѣ носи бережно по вся́ дни. Не извалять, не изсуслати, не измяти и не излити; на руднѣ и на мокрѣ не класти; все то снимаючи съ себя, класти бережно, и беречи того накрѣпко, и слугъ учити: всяму тому наукъ. А самаму́ государю и государыни и дѣтемъ и слугамъ: въ чемъ дѣлать, — то платье ветшано, а остряпавши дѣло, ино перемѣнить, платно чисто, вседне́вное, и сапогъ; а въ празникъ, и въ ведро, и при людехъ, или къ церкви ити, или въ гости, — ино лучшее платье надѣти; изъ утра бережно ходити; и отъ грязи, и отъ дожжа, и отъ снѣга беречися; и питьемъ не ули́ти, и ѣствою, и са́ламъ; не извалять и не иссуслать; на рудѣ и на мокрѣ не сѣсти. Отъ празника, или отъ церкви, или изъ госте́й пришедъ, лучшее платья съ себя снемъ пересмотритъ, и высушить, и вымять, и выпахать, и вычистить; да хорошенько укласти, да упрятати; а и ветшаное и вседневное всякое платно́, и верхнее, и нижнее, и бѣлое, и сапоги, — все измыто всегда бы было, а ветшаное исплачено́ и исшито: ино людемъ посмотри́ти пригоже, и себѣ мило и при́былно; и сиротины дать, — ино спасенья. Платья всякое: и рубашка, и убрусы, и ширинки, и всякой нарядъ, и складши и свертѣвъ хорошенько, положити гдѣ ни буди: въ сундукъ или въ коробью.

38. Како избная порядня устроити хорошо и чисто.

Столъ, и блюда, и ставцы, и ложки, и всякія суды, и ковши, и братины, воды согрѣвъ изъ утра, перемыти, и вытерти, и высушить; и послѣ обѣда такоже, и вечерѣ. А ведра и ночвы, и квашни, и корыта, и сита, и рѣшета, и горшки, и кувшины, и кочарги, — такожъ всегда вымыти, и выскресть, и вытерть и высушить, и положить въ чистомъ мѣстѣ, гдѣ будетъ пригоже быти: всегда бъ всякіе суды и всякая порядня вымыто и чисто бы было; а по лавкѣ и по двору, и по хоромамъ, суды не волочилися бы, а ставцы, и блюда, и братины, и ковши, и ложки по лавкѣ не валялися бы: гдѣ устроено быти, въ чистомъ мѣстѣ лежало бы опрокинуто ницъ; а въ какомъ суднѣ что: ѣства или питія, — и то бы покрыто было, чистоты ради… Изба и стѣны, и лавки и скамьи, и полъ, и окна, и двери, и въ сѣнѣхъ, и на крыльцѣ, — вымыть и вытерть, и выместь, и выскресть, — всегда бы было чисто; и лѣстницы и нижнее крыльце, — все бы то было измыто и выскребено, и вытерто, и сметено; да передъ нижнимъ крыльцомъ сѣна положить: грязныя ноги отпрать, ино лѣстница не угрязнится, и у сѣней передъ дверьми рогожка или войлокъ ветшаный положить, или потирало: ноги грязныя отпрать, чтобы мосту не грязнить. Въ грязное погодье у нижняго крыльца, сѣно или солома перемѣнити, а у дверей рогозинка или войлокъ перемѣнити, или потирало чистое положить, а грязное прополоскать и высушить; и опять, туто же, подъ ноги пригодится. Ино то, у добрыхъ людей, у порядливой жены, всегда долъ чистъ и устроенъ; все по чину, и упрятано, гдѣ что пригоже, причищено и приметено; всегда въ устрой: какъ въ рай войти! Всего того и всякой порядни жена смотрила, и учила бъ слугъ и дѣтей добромъ и лихомъ; не иметъ слово, — ино ударить. И увидитъ мужъ что́ не порядливо у жены и у слугъ, или не потому, о всемъ, что въ сей памяти писано, — ино бы умѣлъ свою жену наказывати всякимъ разсуженіемъ, и учити. Аще внимаетъ, и по тому все творитъ, и любити и жаловати. Аще жена по тому наученію и наказанію не живетъ, и такъ того всего не творитъ, и сама того не знаетъ, и слугъ не учитъ — ино достоитъ мужу жена своя наказывати, и пользовати страхомъ наединѣ; и понаказавъ, и пожаловати, и примолвити; и любовію наказывати, и разсужати. А мужу на жену не гнѣватися, а женѣ на мужа: всегда жили въ чистосердіи. И слуги и дѣти тако же, посмотря по винѣ и по дѣлу, наказывали, и раны возлагати; да наказавъ пожаловати; а государынѣ за слугъ печаловатися, по разсуженію: ино служанкамъ надежно. А только жены, или сына или дщери, слово или наказаніе не иметъ, не слушаетъ, и не внимаетъ, и не боится, и не творитъ того, какъ мужъ или отецъ, или мати учитъ, — ино плетью постегать, по вннѣ смотря; а побить не передъ людьми, наединѣ: поучитн да примолвити и пожаловати: а никако же не гнѣватися ни женѣ на мужа, ни мужу на жену. А про всяку вину: по уху, ни по видѣнью не бити, ни подъ сердце кулакомъ, ни пинкомъ; ни посохомъ не колоть; никакимъ желѣзнымъ или деревяннымъ не бить: кто съ сердца или съ кручины такъ бьетъ, — многи притчи отъ того бываютъ: слѣпота и глухота, и руку и ногу вывихнутъ, и перстъ, и главоболіе, и зубная болѣзнь… а плетью, съ наказаніемъ, бережно бити; и разумно и больно, и страшно и здорово. А только великая вина и кручиновато дѣло, и за великое и за страшное ослушаніе, и небреженіе, — ино плеткою вѣжливенько побить, за руки держа, по винѣ смотря: да поучивъ, примолвити: а гнѣвъ бы не былъ; а люди бы того не вѣдали и не слыхали; жалоба бы о томъ не была.

39. Аще мужъ самъ не учитъ, ино судъ отъ Бога пріиметъ; аще самъ творитъ и жену и домоча дцовъ учитъ, милость отъ Бога пріиметъ.

Аще мужъ самъ того не творитъ, что въ сей памяти писано и жены не учитъ и домъ свой не по Бозѣ строитъ, и о своей души не радитъ, и людей своихъ по сему писанію не учитъ, и онъ самъ погубленъ въ семъ вѣцѢ и въ будущемъ, и домъ свой погубитъ. Аще ли добрый мужъ о своемъ спасеніи радитъ, и жену наказуетъ, тако же и домочадцовъ своихъ всякому страху Божію учитъ, и законному христіяньскому жительству, яко же есть писано, — и онъ, вкупѣ со всѣми, въ благоденьствѣ по Бозѣ жизнь свою препроводитъ и милость Божію получитъ.

40. Самому государю, или кому прикажетъ, годовой запасъ и всякій товаръ купити.

Приказному человѣку, дворецкому или ключнику, или купчинѣ, на комъ вѣра положена, или самому государю, всегда въ торгу смотрити всякаго запасу къ домашнему обиходу, или хлѣбнаго всякаго жита, и всякаго обилія: хмѣлю и масла, и мяснаго и рыбнаго, и свѣжаго и просолу; или товары какіе привозные; или лѣсовой запасъ, и всякій товаръ, кой со всѣхъ земель идетъ. Коли чему навозъ, или коли чего много и дешево у пріѣзжихъ людей и у христіянъ, въ тѣ поры и закупить на весь годъ: ино у рубля четверти не додастъ, а у десяти рублевъ по тому же; а у закупщика дороже купити: а не въ пору купити, ино двои деньги дати; да не любое купишь, коли чего нѣтъ, а надобѣть. И который товаръ или запасъ не портится вдаль, а коли дешево, — ино и съ лишкомъ купитъ; свою нужу исполнить на свой обиходъ, а лишнее въ пору продастъ, коли дорого: иногда свой обиходъ прибылью пролѣзетъ. Такъ-то ведется въ добрыхъ людѣхъ, и у добраго государя домовитаго и благоразсуднаго, своимъ дозоромъ и добрымъ наукомъ. А купить у кого что нибудь, много или мало, у пріѣзжаго ли гостя, или у крестьянина, или здѣшняго торговаго человѣка: торгуй полюбовно, а деньги плати вручь. А надъ тѣмъ, по человѣку смотря и по куплѣ, и по честку ему учинишь: хлѣбомъ да солью и питьемъ: въ томъ убытка нѣтъ; дружба, да впередъ познать: всегда мимо тебя товару добраго не продастъ, и лишняго не возьметъ, и худаго не дастъ.

41. Себѣ на обиходъ купити всякой товаръ заморской, и изъ далныхъ земель.

А бо́бръ у гостя цѣлой купишь, или два, и три: или колько хочешь; да и сдѣлать дашъ дома: на все пригодится; и у рубля полти́на сбудется. А тафты́ косякъ, или сукна́ поставъ, — или розныхъ поставцовъ; или шелку цвѣтного литра или бо́лши; зо́лота и серебра́ по тому же; или бѣлки, или всякого запасу, коли чему навозъ, по своему обиходу смотря, и по промыслу и по рукодѣлью и по своей семьи, и по мастерицамъ и по рукодѣлникомъ, и по своему прожитку, — такъ и покупать; и запасать, коли чево много и дешево: — ино и споро и прибылно. Да толко лучитца мастерокъ свой, портной н сапожьной и плотникъ: ино во всякомъ запасѣ и въ о́статкахъ и въ обрѣзкахъ прибыль будетъ: или къ новому порти́щу остатки пригодятца, или ветчаново починить, — а ты тово не прикупаешь.

А лѣсъ и дрова́ и бочьки и мѣрники; и скалы́, и дубникъ, и лубья, и липнягъ, и доски, и драницы и же́лобы, — коли тому навозъ, въ зимѣ на возехъ, а лѣтѣ на плотехъ и въ лодьяхъ, — на́ годъ запасешь: у всего не додашь; а у рубля четверть збудется; а у пра́сола, коли занадобитца, не лю́бое купишь, а денегъ слишкомъ дашь. А всякой товаръ запасъ, — коли ему навозъ, всякому товару; а дешево, хоти не на́добе, а въ ту пору купи́: и свою нужу исполнишь, — а чего запасено слишькомъ, на томъ денги будутъ съ прибылью.

42. О томъ же: коли что купитъ у кого селъ нѣтъ; и всякой домашней обиходъ, и лѣтѣ и зимѣ; и какъ запасати въ годъ, и дома животина водити всякая; и ѣства и питіе держати всегды.

Годовой обиходъ домовитому человѣку, мужу и женѣ, и у ково́ помѣстья, и пашни, селъ и во́чины нѣтъ, — ино купити годовой запасъ, хлѣбъ и всякое жита, зимѣ на возѣхъ, а полтевое мяса, тако же и рыбу всякую, и свѣжую и длинную осетрину на провѣсъ, и бочесную въ годъ, и семжину и икру сиговую и черную; а которая рыба въ лѣто ставити, и капуста, и тѣ суды, зимѣ въ ледъ засѣкати, — и питье запасное, глубоко: и покрывъ лубомъ засы́пать. И коли надобе лѣтѣ, — и тогды свѣже и готово. А въ лѣтѣ мясо ѣсти покупати домови́тому человѣку, — купити бара́нца, а дома облупити, а овчинка, а бараней по́трохъ прибыль въ столѣ: потѣшенье у порядливой жены, или у доброго повара; много промыслу: изъ грудины ушное нарядити; почки начинити; лапа́тки изжарити; ношки яички начини́ти; печенъ, иссѣкши съ лукомъ, перепо́нкою обертѣвъ, изжа́рити на сковородѣ; легкое, молочко́мъ съ мукою съ яички, приболтавъ нальетъ; а кишечьки — яички нальетъ; баранью голову, можжо́къ съ потрошко́мъ: уху наря́дитъ; а рубецъ кашкою начинитъ; почечныя части свари́тъ; или, начинивъ, ижжаритъ. И такъ дѣлати, ино изъ одново бара́на много прохла́ду; а студень на леду держа́ти хорошо, что останетца. Въ лѣтѣ мяса покупать на обиходъ, подъ росходъ; въ пятницу, въ понедѣльникъ, въ среду, на всю недѣлю купить: не дода́шъ у гривны алтына; посоле́но на леду въ два или въ три дни, или недѣлю, не испортится. А съ Семена дни купи я́ловицу, или колко надобеть, невдругъ, изгодою, — коли подешевле, и ты тогда больши купишъ; мясо соли́ въ годъ, и на провѣсъ; а по́трохомъ семья сыта во всю осень; а на ко́жѣ да на са́лѣ половину возмешь денегъ; а про себя сало перето́пишь на́ годъ. Съ воло́гого: потрохи, голова, уши, губы, скороньи, осердье, окоренье, ноги, печень, почьки, — жо́нки передѣлаютъ, да кашею сальною обва́риною начинятъ, а каша бы овсяная, или гречневая, и яичная: и иною, какою хочешь. А не переядятъ потрохо́въ осенью, — ино въ Роже́ственой мясоѣдъ пригодитца; а рубцы и губы, и уши и ноги коро́вьи, — на студень во весь годъ пригодитца: коли ни дѣлай квашенину, всегды прохладъ. А свиньи доморощеныя въ о́сень бити, по тому же по́лти, въ годъ, солити; а голова и сало и ноги, и желудки и кишки и по́трохъ и спина, — въ осень и въ зиму пригодитца. У промышьленово мужа и у промышьленой жены, у доброй поря́дни, во всемъ спорыня́; а всегды прохладъ и себѣ, и семьѣ, и гостемъ; а не убыточно: по што́ въ торгъ, — и ты въ клѣть. А гуси, и утки, и куры кто дома водитъ, и только у воды́, — ино скормитъ лѣтѣ ничѣмъ; а на́ годъ съ запасомъ съ даровы́мъ. Да кто про себя коровы держитъ, донны́я: лѣтѣ кормъ на́ полѣ, а до́ма всякого корму мно́го у добрые порядни, и лѣтѣ и зимѣ: гуща пивна́я и бражная, и кисе́лная, и квасная, н кислыхъ штей; н отрубе́й овся́ныхъ; и высѣвки оржаные и пшени́шые и ячные, и за́спу дѣлаючи и толокно. И въ о́сень капусту солятъ и свеклу ставятъ, и рѣпу и морковь запасаютъ: и у всего того хряпье и ли́стье и коренье, и обрѣзковъ, и крохъ: и въ ска́терти, и въ столѣ, и въ вѣкѣ хлѣбномъ, и по поли́цамъ, и по чюла́номъ и по зала́вкамъ крохи и остатки и обьѣди, — и домовитая до́брая государыня, или́ клю́чникъ до́брой, все то обираетъ и но судо́мъ ставитъ, и тѣмъ животину: лошеди страдныя, и коровы, и гуси и утки, и сви́ны и куры, и собаки кормитъ; себѣ не убытокъ, а приплоду и прохладу много: всегды въ столѣ прибыль, и себѣ и го́стю. Толко дома роди́тца: куры и яйца, и забѣла, и сыры, и всякое молоко́, — ино во вся дни празникъ и прохладъ, а не въ торгу́ куплено. Всякіе пироги и всякія ка́ши, и всякіе блины и трубицы, и кисели́, и всякіе моло́ка, коли чево́ похотѣлося: а все до́ма гото́ва. А сама́ жена́ все умѣетъ сдѣлать, и слугъ научитъ рядити: отъ такихъ домочадцевъ богатѣютъ мужи. А толко у промышленого человѣка, у домовитого, и у доброй жены, Богъ пошлетъ приплоду по-бо́лши: у сьвиней, или у гусей, или у куровъ, и у вутокъ, или у коровъ молока, и сметаны, масла и сыровъ, и яицъ, сами всегда ѣдятъ воложно: да и людей кормятъ, и милостыню даютъ отъ праведныхъ трудо́въ и отъ благословеныхъ плодовъ; а излишнее упродадутъ: ино на иную потребу пригодитца благословленая денешка, и на милостыню Богу пріятно. А у молода человѣка, или у вдовы, только запасу такого нѣтъ чѣмъ животина кормить, что въ сей главѣ пи́сано, — а коро́вка до́йная есть; или въ дере́вни у молода человѣка не одна́ есть, ино кормитъ сѣна и зрѣти да мукою посыпати овся́ною; или иная какая мяки́нка лучи́тся; да кипятко́мъ облить, или елыче́мъ облить да передъ собою покорми́ть, да издоить; а самой руки умыти чи́сто, и платно́ ветчаное чи́сто же надѣть; и воды теплой принести; потиря́льце на плечи́ принесть и вымя, и соски вымыть у коровы, и потиральцемъ чи́стымъ вы́терть, и въ чи́стомъ мѣстѣ надои́ть; и во всякомъ бреженіи, и на мяккѣ держать, и кормъ класть, какой лучился. А лошадки и кобылы по вся дни такимъ же ко́рмомъ, христіянину, въ избѣ передъ собо́ю покормить: ино будетъ плодови́то и служи́во; и то имъ за овса́ мѣсто. А телята и ягнята молоды, и куры, и гуси, и сви́ньи, и утки тако же передъ собою корми, — какой кормъ, которой животинѣ пригодитца.

43. А толко мужъ припасетъ въ годъ всякаго запасу, и постного, и тому устрой.

А толко у мужа въ годъ все припасено́, и ржи, и пшеницы, и овса́, и гречи, и толокна́, и всякіе запасы, и ячмени, солоду, гороху, и конопли́, — и въ постъ всякіе ѣствы перемѣня́яся по вся дни дѣлаютъ сами, жена съ слугами; и семья́ сы́та и прохладна, и го́стя упо́тчиваютъ безъ убытка; а который ѣствы будетъ похочетъ по́стной, и то и дѣлаетъ: масло конопляное и за́спа, — все дома, и мука и всякіе пироги́, и всякіе блины дѣлаетъ, и соцни, и трубицы, и всякіе каши и лапши́ горо́ховые, и цыженой горохъ, и зо́бонецъ и кундумцы, и вареной и соковые ѣствы: пирогй съ блинцы и съ грибы, и съ ры́жики и съ груздями, и съ ма́комъ, и съ кашею, и съ рѣпою, и съ капустою, и съ чимъ Богъ посла́лъ; или орѣшки въ соку́ и коровайцы. А у доброго человѣка и у порядливой жены толко пасено́, въ по́ру, — коли рыбу свѣжую, купячи́, иную солитъ, иную вялитъ, иную подва́риваетъ, иную сушитъ, мелкую; иную и въ муку толчетъ: въ постъ во шти подсыпаетъ, коли пригоже, — ино въ постные дни про́ гость и про себя. Коли свѣжей рыбѣ не быть, ино преже въ столѣ: рѣтка, хрѣнъ, капуста, росо́лъ ставленой, и иные земленые пло́ды, што Богъ послалъ; рыба, и трутова́я и подвариваная, и ухи пластовые, и щипаные и подвариваные, и всякіе по́трохи: и хохолко́вые, и изъ нѣмецкихъ селдей, и изъ ва́ндышевъ, и въ ро́солѣ, и въ пирозехъ, и въ каши и яглы́, — и всякой снѣтъ, всякихъ ѣствъ по́стныхъ у до́брой порядни много; а все Богъ послалъ дома: ничего въ торгу не купишъ. А брусничная вода́ и ви́шни въ патокѣ, и мали́новой мо́рсъ и всяки сла́сти; и яблока и груши, въ ква́су и въ патокѣ; и постелы́ и лева́шники, себѣ, и про́ гость, и за не́мощь, всегды есть, — толко въ пору припасено́; а ну́жному и болному, и родительницѣ и заѣжжему человѣку дастъ: ино велія мзда отъ Бога. А которой рыбы нѣтъ въ запа́сѣ, или запасъ придержалъся, и бо́чка самому не изо́йдетъ, — купити, прибавъ товарыща или два, бочку осетрины, или бѣлужины, или селдей, или какой нибуди рыбы, или осетрины купить вмѣстѣ; или икру, вся́кую: у рубля пяти алтынъ не додашъ; а не будетъ въ запасѣ чево́, — а гостя для, и про себя что пона́добится купить, — и того въ торгу не добудешъ, а и добудешъ не въ пору, и тѣ въ три дорога, а не милой кусъ.

44. О запасной прибыли впередъ.

А у доброго человѣка и у доброй жены у поря́дливой, — и у смы́шленыхъ и у разумныхъ и у благоразсудныхъ и у богобоязливыхъ людей, и у годового и у всякого запа́су, и у рухляди, и у питья, и у ѣствы, и у хлѣбново и у воложново, и у мясно́во, и у полтяво́го, и у ры́бного, и у ветчины, и у солони́ны, и у вя́лого, и у вѣтренего, и у просолу, — и сухари и мука́ и толокно, и ино́й запасъ; и макъ и пшено, и горохъ и масло, и конопли́, и со́ль, и солодъ, и хме́ль, и мыло и зола́, и всякой запасъ, чему мочно впредь быти, — въ береженіи и сгноено. — У всякого бы го́ду, во всякомъ обихо́дѣ и въ запа́сѣ сходилося: въ иномъ году чево не родило́ся, или дорого, — ино тѣмъ запа́сомъ, какъ даромъ, проживетъ, а нужного и болново и недоста́точново ссудитъ; и подможетъ, кому какъ пригоже. А коли чево изобилно запасено въ дешевую пору, ино въ дорого́влю и прода́стъ, ино самъ ѣлъ и пилъ даромъ; а де́нги опять дома: до́брого человѣка и до́брой жены́ николи, ни въ чемъ, меженина не иметъ, а ста́рой запасъ держать на много лѣтъ, кои не портятся.

45. Огородъ и садъ какъ водить.

А у котораго человѣка огородецъ есть, и кто́ пашетъ огородъ, — самъ ли государь дозираетъ или государыня, или кому приказано: пе́рвое, — городба перекрѣпити, чтобы въ огородъ собаки ни свиньи, — ни куромъ, ни гусемъ, ни уткамъ, и вся́кой животинѣ, — взоити не имутъ ня съ чюже́во двора́, ни съ своего; ино я́блонямъ, и всякому плоду пакости нѣтъ, а съ сусѣды остуды. Толко отъ тебя́ твердо, — твоей животинѣ къ нимъ не умѣть, а ихъ къ тебѣ. А дворъ бы былъ, по тому же, вездѣ бы крѣпко гороженъ, или тыненъ; а ворота всегды́ приперты; а къ ночи замкнуты; а собаки бы сторожливы; а слуги бы стерегли же; а самъ государь или государыня послушиваютъ но́чи; а огородъ всегды бы былъ за́мкнутъ; да, кому прика́зано, тотъ бы его всегды бере́гъ, и день, и ночь, и въ немъ всегда дозира́лъ. Да какъ гряды копати веснѣ, и навозъ класти; а навозъ зимѣ запасати, и къ сади́ломъ на ды́ни, варовые гряды гото́вить, и всякіе сѣмена водить у себя, и посадивъ или посѣявъ всякія сѣмена, и всякое обиліе, въ пору поливати, и укрыва́ти и отъ морозу всегды беречи, и я́блони подчища́ти и суша вытира́ти и по́чки разсаживати, и пѣнки и почки прививати; и гряды, всякое обиліе, полоти, и капуста отъ че́рьвя и отъ блохи беречи: и обирати и оттрясывати. А возлѣ тына, около всего огорода, борщу́ сѣетъ, — гдѣ кропива ростетъ, — и съ весны его варитъ про себя много; и тово́ въ торгу́ не купитъ; и нужному дастъ Бога ради; а толко у молода́ человѣка, — ино и упродастъ на иную вологу. А какъ насадитъ капусты и све́клы и поспѣетъ, — листье капустное варитъ; и какъ учнетъ ви́тися въ клубъ, и толко часта́, — ино, изрѣтка, сѣкучи́, вари́ти, а листья, обламываючи, животина корми́ть. А въ ту пору, и до осени, борщъ, рѣжучи, сушить: ино всегда пригодится, и въ годъ, и въ даль; и капусту все лѣто варить, и свеклу; а въ осень капусту солити, а свеколный росо́лъ ставить, а огурцы солитъ же; а лѣтомъ прохлажа́етца! Ѣстъ дыни, стручье, морковь, огурцы́ и всякой овощъ; а Богъ послалъ поболше чего пригодилося, — ино и упродастъ. А садъ разводити про себя: ино прививка, отъ древа до́ древа, по три сажени и болши, — ино яблони ростутъ вели́ки, обильно и всякимъ овощемъ не помѣшаетъ ростетъ; а какъ будетъ густо, отъ вѣтья, по дере́віемъ не ростетъ ништо́; ино борщу́ насѣяти, — ино всегды́ плодъ. А падушокъ я́блочныхъ, и што поспѣло: огурцы и дыни, и всякой овощь — въ пору бы обирати: што про себя съѣстъ; или поблю́сть; или въ годъ что поставить; или что осолить: или въ квасы́ ста́вить яблока и гру́ши; или въ па́токѣ и ягодный и вишневый морсъ. А въ дешевую пору и грибы сушить, и грузди и рыжики солить, и всякой овощь въ годъ ставити или чево упродати: то бы все было убережено. А сѣмена бы всякія у себя́ водить ино вели́ка прибыль — въ торгу тово́ не купишь; а будетъ слишкомъ, и ты и продашь.

46. Какъ человѣку запасное питье держать про себя и про гость и какъ устроити то при людехъ.

А коли одинакой человѣкъ, а не богатой и запасистой, держитъ про́ гость пивцо́ въ запасѣ, — переварки, на Мартѣ сваривъ ячной, и подсытивъ. А обычное пивцо́ есть же, а медку разсытитъ къ празнику: и вдаль поблюдетъ, въ леду засѣчено, медокъ и Мартовское пивцо́. Аще коли празникъ, или именины, или свадба, или родины, или крестины, или по родителехъ па́мять, или лучи́тся гость изъ-не-весть любо пріѣжжей, любо званой или избранной человѣкъ, или игуменъ честной, — и, одново часу, изъ одной бочки въ пять оловениковъ меду нацыдятъ; или́, по́ людемъ смотря: въ бочечки малые, да запасного мушкатцу въ мѣшечкѣ, а гвозьди́ки въ другомъ мѣше́чкѣ дерьжитъ; а въ третьемъ мѣше́чкѣ всякихъ благовонныхъ зе́лей: въ печи подваривъ, въ оловеники покласти, или въ бочечки, въ горячее вино́; а вишневого морсу, и малиноваго два оловяника; а въ иной патоки готовой: ино въ одночасье, — шесть медовъ про́ гость, да два вина; да вишневого морсу и въ переварку въ оловениче́къ поддастъ: ино два пива. И, кто съ запасовъ живетъ, и у порядливой жены́, — ѣства запасная же. Ино всегды го́стя не соро́мъ: хотя пиръ, — нужново чево прикупитъ, ино далъ Богъ, всего дома много.

47. Тому же пивоваренной наказъ: какъ пиво варить и какъ медъ сытити и вино курити.

А въ пивоварнюю поварню, на пиво и на брагу и на кислые шти, со́лоду и муки́ и хме́лю отдать: то бы было все въ письмѣ и смѣрено и счетѣ. А коли пиво затираютъ, — ячное или овсяное или оржано́е, или хме́ль парить, и у квашенья и у сливаныя дозира́ти самому: все бы было бережно и чисто и не раскрадено, и не испроку́жено, и за посмѣхъ не выпить. А коли пиво варятъ, — ино отваривъ пиво, и силенъ толко со́лодъ, — ино бо́чку и бо́лши друго́во пива наря́дятъ а послѣ всякого пива водою на гущу поливаютъ; воды взогрѣвъ ведръ съ тритцать и съ сорокъ, на ячную гущу, и пятдесятъ и шестьдесятъ, взогрѣвъ, взлити и больши, по вари смотря; и тотъ исътокъ приквасить: добре́ хорошо́ семьѣ пити; а изъ первого послѣду, приквасивъ, на кислые шти пригоди́тся. А уксусъ ста́вити изъ до́браго сусла, и въ береженьѣ и въ теплѣ держати, и въ чистотѣ приходити къ нему. А хмели́ны пивные копи́ти на винную брагу, и въ перепускъ, и брежно держати, а на то ветшаные суды пригожаются, толко бы было въ запа́сѣ, да и перекрѣплены. А медъ сыти́ти самому: а какъ кишетъ хоромина та́ запечатати: самому толко надзирати, и хто бы тутъ не ходилъ. А слива́ти самому же; а на сливанье бы пе пили же. А вино кури́ти: самому́ неотступно же быти; или, кто вѣренъ прямо, тому́ приказати; и у перепуска по тому же; да смѣнять: по сколку изъ котла араки́, пе́рвой и другой, и по слѣду уточатъ; а у перепуску по тому же смѣчать: колко изъ котла укуритъ, — первого и середнего и послѣду. И на погребъ, и на ле́дникъ, и въ сушило и въ житницы, — безъ себя́, никакова́ не пуска́ти; вездѣ самому отдавати, и отмѣрити, и отвѣсити; и сколко кому́ чево́ дастъ, то все записати.

48. У поваровъ и у хлѣбниковъ, и вездѣ, всякой порядни ключнику дозирать.

А у поваровъ бы и у хлѣбниковъ, и у всякихъ приспѣшниковъ, была бы вся порядня: и котлы, и ско́вороды, н горьшки и мѣдные и желѣзные, и таганы, и рѣшо́тки, и чюмпчи, и корцы́, — все бы было чисто и цѣло и изва́ры: все бы было въ сче́тѣ и въ писмѣ; а мѣдяное и оловяное въ вѣсу́; а по вся дни у ключника то бы было пересмотрѣно: чтобъ было все по числу́ и перекрѣплено, и вымыто и въ суши́, и на мѣстѣ лежа́ло, за́мкнуто; а бочки и вся́кіе суды перемыты и перекрѣплены, и лежало бы всушѣ и замкнуто.

49. Мужу съ женою совѣтовати, какъ ключнику приказати о столовомъ обиходѣ, о поварнѣ и о хлѣбнѣ.

По вся дни и по вся ве́черы, исправя си долгъ душевный и во утріи встали по зво́ну; и, послѣ пѣнія, мужу съ жено́ю совѣтовати о устроеніи домовномъ: на ко́мъ что положено́, и кому которое дѣло прика́зано вѣдали, и тому наказа́ти: что коли́ устроити ѣсти и пити, про́ гости, или́ про себя. Или клю́чиникъ по государеву приказу прика́жетъ что купити на обиходъ; и купивъ, что принесутъ, то смѣти; и правды смотри́ти; а повару отдастъ что варити: и хлѣбнику, и на приспѣхи на всякіе по тому же отдастъ. А всегды бы то было въ памяти, что государю сказати. А въ пова́рню, ѣства мясная и рыбная и печь и варити отдавати въ число: колко государь велитъ, и па колко блюдъ; да испечено́ и сварено́ ,— но, у повара взяти, въ число же. А на столъ всякая ѣства ставити по государеву наказу, — по гостемъ смотря; а хлѣбенной приспѣхъ, по тому же, да́ти въ число́, и взя́ти въ число́ же. И вся́кой ѣствы что у стола́, останетца, и цѣло и едино, и ухъ и ириспѣху всякого: а цѣлую ѣству — перебра́ти; а почато́е о себѣ, и мясное и ры́бное, и покласти въ суды́, въ чи́стые и въ твердые, и покрыть, и въ леду́ засѣчь; а початая ѣства, и всякіе оста́тки, дава́ти на обиходъ, ка́къ на пригожу; а цѣлое блюсти́ про государя и про господарыню и про́ гость. А питье въ столъ давати по приказу: по гостемъ смотря, и безъ госте́й. А государынѣ брага, или квасъ. А суды бы всякіе, столовые и поваренные, всегды послѣ стола въ горячей водѣ перемыть и переполоскать, и перетерть и высушить; и всѣ, собравъ, счести; и устроити, съ замкомъ, — гдѣ что живетъ, и у ково што на рукахъ; а столовые суды: оловяники, и браны и ковши, и судки столовые, всегды беречи; и уксусницы, перешницы, росо́лники, солоннцы, ло́шки, блюды, ста́вцы, скатерти, и фаты, — всегда бы было чи́сто и готово на столъ; и столъ бы былъ чистъ, и скамъи, и лавки, и избы; и о́бразы на стѣнѣ уставлены; а изба метена и устроена. А уксусъ и огуречной росолъ, и лимо́нной, и сли́вной, — все бы нѣжено́ въ ситцѣ; и огурцы, н лимоны, н сливы — также бы, очи́щено и перебрано́, и на столѣ бы было чи́сто, искусно. А рыба прутова́я, и вся́кая вя́лая, и всякая студень посная — или́ мясна́я, и икра, и капуста, — очи́щено, и по блю́домъ раскладено́: до стола изгото́влено; а питье бы всякое чисто, въ ситцѣ бы цѣжено; а ключники бы и повары, и хлѣбники, и вся́кіе стряпчіе сами бои къ столу, при́ людехъ, устроилися чистенко; а руки бы были мыты чисто, во всяко стряпни. — А всякіе суды, и всякая порядня у ключника, и у всѣхъ стряпчихъ, все бы было мыто и чисто н бережьно́; и у государыни, и у ее слугъ, по тому же. А ѣства и питіе на столъ понести осмотря́: чтобъ то судно было чи́сто, въ чемъ несешь; и ѣства илп питіе чисто же бы: безъ пороха и безъ пригарины, осмотря оставить; а поставя ѣству или питіе, да тутъ ни кашлять, ни сморкать: отшедъ на сторону, вычистить носъ, или́ выкашлятся: ино не скаредно, и вѣжливо.

50. Ключнику приказъ, какъ пиръ лучится.

А коль пиръ большо́й, ино всюды самому́ дозира́ти, и въ поварнѣ и въ хлѣбнѣ; а за столомъ, ѣства отдава́ти, — приставити добра́ человѣка; а у поставца, у питья и у судовъ, бережной же — доброй человѣкъ надобе. А въ столъ питье подавати по государеву наказу, кому што велѣно; а на́ сторону никому не давати безъ велѣнія. И какъ пиръ минетъ: и весь запасъ серебряной и оловяной, и всякіе суды смотрити, и счесьти, и поваренной и хлѣбной: и ѣства перебрати, н питіе со́зрити, початое́ допо́лнивати. А въ пиръ на дворѣ бреженъ же человѣкъ надобе: всего бы смотрилъ и берегъ: и дома́шніе всякіе порядни: не окрали бы чево́, и гостя пьяново беречи: что́бы не истерялъ чево, и брань бы не была. А какъ столъ отойдетъ, ино суды смѣтити всякіе, и перемыти велѣти; и всякая ѣства перебра́ти мясная или рыбная и студень и ухи́; и устро́ити по прежеписанному. А коево́ дни пиръ тово́ вечера, или пора́ну, самому государю пересмотрити: все ли но здоро́ву; и смѣтити, и перепыта́ти у ключника подлинно: колько чево́ съѣдено и испито, и кому что отдано, и кому что послано; и всякой бы расходъ, во всякомъ обиходѣ, былъ въ вѣдомѣ; и суды бы всякіе были въ счетѣ; и умѣлъ бы государю сказа́ти про все́ прямо: куды што разошло́ся, и куда что дано́, и ско́лко чево разошлося. И толко, далъ Богъ, все по здорову, н не исьтеряно и не испорчено, и ништо; ино государю ключника приго́же почти́ти и иныхъ слу́жекъ по тому же, и поваровъ и хлѣбниковъ, кото́рые бережно стряпали, а не́ пили: ино всѣхъ прохладитъ и пако́рмитъ н напо́итъ.

51. Наказъ отъ государя ключнику: какъ ѣства постная и мясная варить, и кормить семья, въ мясоѣдъ и въ постъ.

Да и то́ бы было отъ государя въ нака́зѣ ключнику: въ мясоѣдъ кака́я ѣства отдавати въ поварню, про государя, и про домашней обиходъ, и про́ гость; а въ постные дни потому же. А о питьи, потому жъ, нака́зъ надобеть отъ государя ключнику: какое питье носити про государя и государыня и про́ семью, и про́ гость. И то все чинити и дѣлати и отдава́ти по государеву нака́зу: а о вся́комъ обиходѣ ключнику государя, по вся утра, спра́шиватися: о ѣстьвѣ и о питьѣ и о всякомъ обихо́дѣ; какъ государь накажетъ, такъ и твори́ти. Государю съ женою о томъ, о всякомъ обихо́дѣ, въ домашнемъ, совѣтовати; и ключнику наказывати, какъ челя́дь кормити по вся дни: хлѣбъ рѣшетной, шьти; да каша съ ветчино́ю житкая, а иногда густа́я, съ са́ломъ, перемѣняя часто; мяса лучится дадутъ къ обѣду; а въ недѣлю и въ празники: иногды пироги, а иногды кисель, а иногды блины, или иная какая ѣства; а у вужины: шти да молоко́, или́ каша. А въ посные дни: шти, да ка́ша жи́ткая, — иногды съ со́комъ; и́ногды сущь, и́ногды рѣпня; а у вужины, иногды шти, капуста, толокно; иногды росо́лъ, и́ногды ботьвинье. По недѣлямъ, по пра́зникомъ: къ обѣду пироги какіе, или гуща, или яглы́, или селедавая каша, и, что Богъ лучитъ; а у вужину: капуста, росо́лъ, ботьви́нья, толокно́. А у женъ, у челя́денныхъ и у дѣвокъ и у робятъ, — по тому же; а отрадымъ людемъ та́ же; да прибавка остатковъ столо́выхъ, государевыхъ и гостиныхъ. А лутчіе люди, которые торгуютъ, тѣхъ государь въ столѣ у себя́ сажаетъ; а коли го́сти ядятъ, — и они стряпаютъ; а послѣ стола ядятъ ѣствы, съ прибавкою и столовыхъ остатковъ. А у государыни, мастери́цамъ и швеямъ по тому же: сама за столо́мъ ихъ кормитъ, и подаетъ имъ отъ себя. А челя́ди питье: исто́къ пивно́й; а въ недѣлю и въ пра́зники брага, а торго́вымъ всегда́ брага: а питье́мъ всякимъ государь жалуетъ, или прикажетъ; а въ прохладъ и самимъ пивца дадутъ.

Наказъ отъ государя повару и клю́чнику, или отъ государыни: варить на семью челя́ди, или нашимъ, скоромную и постную ѣству: капусту или натину, или кро́шиво, иссѣчено мелко; и вы́мыть хорошо́, и уварить, и упарить горазно. Въ скоромные дни мяса или ветчина́, или́ сальца ветчи́нного положить; забѣлъки поддать, да припа́рить; а въ постъ сочкомъ залить или иной какой навары приба́вить, да упарить хорошо, или заспицы подсыпать, да съ солью и съ кислы штями прива́рить; а кашку всякую, по тому же, уварить и упарить хорошо, съ саломъ или съ масломъ, или селедо́вую, или съ сокомъ; и всякую семейную ѣству хороше́нько усьтряпати. И хлѣбы семейные такожъ мѣси́ти, и укъва́сити, и вы́валять хорошо и выпечь, и пирошки́ семейные, по тому же; и всякую ѣству хороше́нко и чисьтенько устряпать: какъ своя душа любитъ. И вся́кой семе́йной ѣствы государыня или дворецкой самъ кушаетъ и толко не хорошо́ сварено́ или испечено: и о томъ бранить на повара или на хлѣбника, или на же́нки, которыя то стря́паютъ. А дворецкой того не брежетъ: ино на него бранить; а государыня того не брежетъ, ино мужу на нее брани́ти. Какъ своя́ душа любитъ: такъ слу́жокъ и нищихъ корми́ти; ино то Богу въ честь, а себѣ во спасеніе. Да государю или государынѣ всегдн взира́ти, и спрашивати слугъ, и маломощныхъ и убогихъ, о всякой нужѣ, и о ѣствѣ и о питіи, и о одежи и о всякой потребѣ, и о всякой скудости, и о недостатки, и о всякой обидѣ, и о всѣхъ тѣхъ нужахъ, о нихъ Бога ради, промышляти, и попеченіе имѣти, ели́ко вмѣстимо, сколко Богъ поможе, отъ всея́ душа: яко же о своихъ ча́дехъ, и яко же о при́сныхъ. Аще кто не радитъ о семъ, и не болѣзнуетъ о сихъ: да будетъ анафе́ма. А кто сіе съ любо́вію, отъ всея душа, и брежетъ и хранитъ, — велію милость отъ Бога обря́щетъ, и грѣхо́мъ свобо́ду получитъ, и жизнь вѣчную наслѣдитъ.

52. Въ житницахъ и въ закромѣхъ о береженьи.

А въ жи́тницахъ бы у ключника, былъ бы всякой запа́съ и всякое жита: солодъ и ро́жь, и овесъ, пшеница не сгноено́, и не накапала бы, и не навья́ло; не прото́чено отъ мышей, и не слегло́ся, и не за́тхло бы ся. А что́ въ бочкахъ, или въ коробахъ: мука и всякой запа́съ, и горохъ и конопли, и греча, и толокно, и сухари, и ржаные и пшеничные: то бы было все покрыто, и судно твердо, и не намокло бы, и не́ знило, и не затхло́ся. А всему бы тому была мѣра и счетъ: сколко чево изъ села или изъ торгу приве́зутъ,—и записати; а что вѣсовое, то взьвѣсити; и колко коли отдастъ чего на расходъ или взаймы́ и на всякой обиходъ; или кому государь велитъ что дати, то все записати же. И сколко чего сдѣлаютъ, то бы было вѣдомо жъ; и хлѣбы и колачи́, и пиво, и вино, и брага, и квасъ, и кислые шти́, и уксусъ, и высѣвъки, и о́труби, и гуща вся́кая и дрожьжи, и хме́лины; то бы било все у ключника въ мѣрѣ, и записано, а хмель и медъ, и масло, и соль, — вѣшено.

53. Въ сушилѣ тако же смотрити.

А въ суши́лѣ мясо полтевое и солонина вѣтреная, полотки́, и язы́ки, и прутовая ры́ба и пласти, я всякая рыба вя́лая и вѣтреная, и въ рогожахъ, и въ кро́шняхъ, и вандыши, и хохольки́: что бы было все въ счетѣ и въ писмѣ: сколко чево ку́плено и вы́вѣшено, провя́лено и положено́; и держано бы то бре́жно, и не згноено, и не измо́чено, и не измято; убережено бы отъ всякіе пакосьти, и всегда́ замкнуто. А всегда пересматривати и перебирати, а лучшее вдаль блюсти; а что ся попортитъ, и то напередъ изводити, какъ пригоже, семья кормити, хорошенько удѣлавъ; и нищимъ дать: ино спасе́ніе; а изгной — даромъ за ворота выкинуть.

54. Въ погребѣ и на ледникѣ всего беречи.

А въ погребѣ и на ле́дникехъ, и на погребицехъ хлѣбы и колачи, сыры, я́ица, забѣла, и лукъ, чеснокъ, и мясо всякое, свѣжее и солонина, и рыба свѣжая и просольная, и медъ прѣсной, и ѣства вареная — мясная, и рыбная студенью, и всякой запасъ ѣсто́мой и огурцы, и капуста соленая и свѣжая, и рѣпа, и всякіе овощи, и рыжики, и икра́, и ро́солы ставленыя, и морсъ, и квасы́ я́блочные, и воды брусничные, и вина фрязскіе, и горючіе, и меды всякіе, и пива, — сы́ченые и простые и брага, — и всяго того́ запасу ключнику вѣдати; и сколко чево на по́гребицѣ поставлено, и на ледникѣ и на по́гребѣ, — и все бы то сочтено́, и перемѣчено: што вполнѣ, што не вполнѣ; и перемѣчено и записано: и сколько чево куды отдастъ по приказу государеву, — и сколко чево разойдетца: то бы было все въ счетѣ, — было бы што господарю ска́зать, и отчетъ во всемъ дати; а все бы то было чисто и въ покры́тѣ, и не затхлося, и не заплѣснѣло и порокисло; а вина фрязскіе, и сыченая перевара, и всякое лутчее питье, въ оприше́нномъ погребѣ, за замкомъ держать: а самъ бы тамо ходилъ.

55. А въ клѣтехъ и въ подклѣтехъ, и въ онбарехъ, устроити всякая порядня ключнику, по государеву наказу.

А въ клѣтехъ и въ подклѣтехъ, и въ онбарехъ устроити по государеву наказу ключнику, всякая порядня, платье ветчаное и дорожнее, и служне и по́лсти и епапьчи́, и кепеняки, и шляпы, и рукавицы, и медве́дна, и ковры, и попо́пы, и войлоки, и сѣдла, и саадаки и съ луки, и съ стрѣлами; и сабли и топорки, и рогатины, и пищали, и узды, и оброти, и морхи лысины; и похви и остроги, и пле́ти, и кну́тье, и вожжи: моржо́вые, реме́нные; и шле́и и хомуты; и дуги, и огло́бли, и миндери́ и мѣхи ды́мчатые, и сумы, и мѣхи холщо́вые; и припоны, и шатры́ и по́логи; и ленъ и посконь; и веревки и ужища; и мыло и зола́: и ветшаной всякой запасъ; и обрѣзки — ветшаное и новое, и пълатяные и ко́женые, и желѣзные обло́мки всякіе, и гво́здье и чѣпи, и замки́, и топоры, и за́ступы, и всякой желѣзной запасъ, и всякая ру́хледъ, и все то разобра́ти, что пригоже въ коробьяхъ положи́ти, или въ бочкахъ, ино́е по гряткамъ, иное по спицамъ, иное въ коробехъ; гдѣ что пригоже, то туто и строи́ти; въ сухѣ и въ покрытѣ, отъ мышей, и отъ мокра́ и отъ снегу беречи, и отъ вся́кія пакости; и все бы было въ счетѣ и въ писмѣ: сколко чево но́вого и ско́лко ветча́ного, а что́ попо́ртилося, то починивати; а всегды бы было готово, всякой запасъ, какъ попытаютъ. А въ инѣхъ подклѣтехъ, или въ подсѣнье, или въ онба́рѣ, устроити: сани, дровни, телѣги, колеса, одры страдные, дуги́, хомуты́, оглобли, рого́жи поско́нные, вожжи, лыка и мочала, веревки лычьные, о́броти, тяжи, шлеи́, попоны, — ино́й дворо́вой запасъ коньской: гдѣ что пригоже поста́вити, или положи́ти, или повѣсити. А лутчіе сани, возъ, коптана́, калыма́га, — укрыть, на подкладкахъ, все бы было брежно, въ сушѣ, съ замкомъ. А въ иномъ онба́рѣ: бо́чки и мѣринки и цѣпники, высытки, корыта, жо́лоба, изва́ры, корцы́, си́та, рѣшо́та, фля́ги, — и всякая поря́дня поваренная и погребна́я. Которые бочки и всякое судно попо́ртилося: или о́бручи о́гнили, или свали́лись, — и то велѣти окрѣпити, или уторы передѣлати, или дъна́ попра́вити, и обручи новые наколоти́ть: все бы то было готово, и выпарено, и вымыто и вы́сушено: чтобы ни гнилью, ни плѣснью и затъхолью не па́хнуло: дрожьжи бы, ни хмѣлины — не засушены, ни за́гнилися. Какъ которое судно пона́добитца, ино бы было готово. А дубникъ въ запа́сѣ держати; что починити или здѣлати. А ветчаная бочка, извара, и выситокъ, до́нце, дощечки бочечные и вѣчка, и всякое судно, — все бы было припрятано, а все то ся пригожаетъ, — на худую потребу и ты доброво не портишь.

56. Въ сѣнницахъ сѣно, и въ конюшняхъ лошади, и на дворѣ, и дровяной запасъ устроити, и всякая животина.

А въ сѣнницахъ бы было сѣно усътро́ено и не разры́то, и не разволочено по лѣсницѣ и по крыльцу, и по двору не растаскано; всегда бы было о́брано и подмѣтено, и въ нога́хъ и въ грязи не затоптано; н не нака́пало бы, и не навъяло, и не гнило, замкнуто. А солома потому же бы была въ кровлѣ; и прикла́дено и обрано́ и очи́щено и не разволо́чено бы и подметено́. А въ конюшнѣ бы дозира́ти по вся дни. Сѣна бы кла́сти въ я́сли какъ лошедемъ сьѣсти, и въ ноги бы не рыли; а соло́мка подъ лошади сла́ти, и подгребати; по вся дни перетрясивати. А на́ воду бы лошади водити брежно: робя́та бы на нихъ не гоня́ли; и вы́валяти и вычесати, и на дворѣ, изъ жолоба, овсомъ передъ собою кормити, и попо́нами те́рти, и покрыти; а лѣтѣ подкупывати и холоди́ти. А коровамъ, и гусемъ и уткамъ и курамъ, и свиньямъ, и собакамъ — кормъ давати; и, въ хлѣвы́, солома слати и подгребати; и пои́ти, — вода ста́вити; а животинѣ, и собакамъ, и куромъ — на то свои суды держати: а чистыхъ судовъ не поганити. А по всѣмъ службамъ ходити вече́ре, и въ ночи, и утре: въ фонарѣ бы была свѣча съ огнемъ. А въ конюшнѣ и у сѣна и у соло́мы: однолично изъ фонаря огня не вымати, всякія при́тчи.—А бре́вна бы, и дрова́, и до́ски, и драници и усѣчки и урупки дощаные и бревенные, и всякіе, устроити въ сторонѣ, гдѣ пригоже, а не на дорогѣ; а бревна и доски и драницы на подъкладкахъ: а толко подъ кровлею, — и тово́ лутче: чтобы въ сухѣ, не навьяло и не замокло. Дрова́, толко сухи, ино топитца хорошо; и служкѣ приступитца, и взять и понесть, ино хорошо и не угрязнено.

57. Въ поварняхъ и въ хлѣбняхъ и въ дѣловыхъ избахъ устроити дѣланое.

А въ повареныхъ избахъ, и въ поварнѣхъ, и въ хлѣбнѣхъ — гуща, и дробина, и отруби всякіе, и кобустное коренье, и хря́пье, и листье свеколное и рѣпное плюсенье и бражная гуща, и винная изъ котловъ, и кисельные ожимны, и въ поварьнѣ, отъ мяса и отъ ры́бы что очищаютъ, и кислыхъ штей, и опа́ра, — всего́ тово́ не мета́ти: все то обрати и въ ветчаные суды класти, которые ни въ пова́рьнѣ, ни на погребѣ не пригодятся; да ста́вити то въ опричьней хоро́минѣ: и тѣмъ страдные лошеди кормити, или чѣмъ подмѣшиваючи: невѣйницы, или овся́ной муки или сѣно рѣзаное, или чево иного; — а иное коровамъ дава́ти, и свиньямъ, и гусемъ, и уткамъ, и курамъ, собакамъ: что какъ приго́же и муко́ю посыпаютъ. И помывки судовые, и горше́чные, и коте́льные, и всякіе ѣствы и пригарины, — все жнвоти́нѣ копятъ: животина тѣмъ сы́та бываетъ. А и въ дере́внѣ животинѣ такой кормъ ссылаютъ же.

58. На погребѣхъ, и на ледникѣхъ, и въ житницахъ, и въ сушилѣхъ, и въ амбарѣхъ, въ конюшняхъ, часто государю смотрити.

А на погребѣхъ, и на ледникѣхъ, и въ житницахъ, и въ сушилѣхъ, и въ клѣтѣхъ, и въ амбарѣхъ, и въ конюшняхъ, по вся дни, вечерѣ, въ кой любо день: пересмотрити самому государю всякаго питья и ѣствы, и всякаго обиходу, и всякаго запасу, и всякой рухляди; и въ конюшнѣ, и хлѣбнѣ, и въ поварнѣ, и въ чьемъ приказѣ, или у ключника, или у повара, или у хлѣбника, или конюха, — всего пересмотрити самому, по тому чину устроено, какъ въ сей памяти писано; и перепытати: колько чего есть; и всему ли есть мѣра, и счетъ, и письмо; да все то смѣтити и сгадати самому: и сколько чего сдѣлано, и колько чего разошлося, и кому что отдано, и коли что съѣдено и испито: и все бы то умѣли сказать именно. Иного вечера ключника, иного вечера хлѣбника, иного вечера пивовара и конюха, смотрити и смѣтити во всемъ: а ключнику туто же быти. И, только вездѣ стройно, по наказу все соблюдено, и счетъ сойдется; и устроено хорошо и счетъ отдастъ подлинно, и памятно, и прямо, — ино того, за его службу, жаловати; а кто небреженьемъ, — или истерялъ, или испортилъ, или солгалъ, или покралъ, — ино, несмотря по винѣ, наказывати, и пеня чинити. — А государю или государынѣ, или ключнику или ключницѣ, по вся дни изъ утра вставъ, всего преже, по всему двору, у всѣхъ хоромовъ, замковъ пересмотрити; а гдѣ есть печати, ино печатей, и по здорову, — ино добро! А гдѣ худо замкнуто, или замокъ испорченъ, или не замкнуто, или печать испорчена, или худо запечатано, и, въ ту хоромину влѣзши, всего пересмотрити. Только тати были, ино знать; или свои крали: или небереженьемъ худо замкнуто. И о томъ, по винѣ смотря, и бранить, и наказывать, и обыскивати: гдѣ кто ночевалъ, и что какъ дѣялося; и по тому, управа чинити. А въ вечерѣ, по тому же, вездѣ нереходити и пересмотрити, и перенюхать: гдѣ огня бы не уронили. На погребѣ и на ледникѣ — и въ вечерѣ и утрѣ смотрити: гвоздье крѣпко ли прибито; не подтекаетъ ли уторами, и ладами, и дномъ гдѣ не каплетъ ли; вездѣ ли чисто и въ розсолѣ, и не заплѣсневѣло и не загнилося, и покрыто, и перечищено, и перебрано. Только все по здорову, въ такомъ береженьи, — ино добро; а что не по тому, — ино, по винѣ смотря, наказывать. А въ поварняхъ, и въ хлѣбняхъ, и во всякихъ хоромѣхъ, и въ конюшняхъ — у всякой животинѣ, и въ сѣнникѣхъ; у мастеровъ, и мастерицъ, и у учениковъ, и у торговцевъ, и у всякихъ своихъ прикащиковъ, всегда всего пересматривати и пытати; только все по наказу, — ино добро; а не по тому, — ино наказаніе, по винѣ смотря: по прежеписанному. А за доброе устроеніе и бреженіе любити и жаловати всячески: доброму бы была честь, а худому гроза.

59. Съ слугами государю смѣтяся во всемъ, по тому ихъ жаловати.

А которой служка, въ которомъ приказѣ береженъ и по наказу живетъ, и въ службѣ чисто ходитъ, безъ хитрости: за посмѣхъ не отдастъ и самъ не украдетъ, а вездѣ ѣства и питіе, и всякая потреба, покрыто и не сгни́ло, и не поплѣсневѣло, и проки́сло, и вездѣ подметено́, и вы́терто, и не намочено, и не на́лито, и не нагря́знено и не насорено; и суды всякіе чи́сты, перемы́ты; и устроено хорошо; и ѣстъва остатки всякіе перебърано́, цѣло, — и впередъ блюсьти про государя и про́ гость, а початое въ расходъ давати, и въ столъ, кому что достойно, и какъ ему велѣно отъ государя, и, во всякой службѣ кто добро и бе́режно, и бесхи́тростно служитъ, и по приказу чинитъ, — и того пожаловати, и добрымъ словомъ привѣчати, ѣсьти и пити подати, и нужа его всякая иснолнити; а чево безхитростно — или недогаткою, или неразуміемъ не гораздо сдѣлалъ, или попортилъ што, — и въ томъ словомъ наказати, передо всѣми — всѣ бы того́ берегли́ся — и вины отдати. А въ другіе, и въ третіе проступитъ, или лѣни́тца, и, ино, по винѣ, и по дѣлу смотря, по разсуженію наказати, и побити: доброму бы была честь, а худому наказаніе, и всему́ тому нау́къ. А государыня жонокъ и дѣвокъ, въ своемъ обиходѣ, такоже сзираетъ, и смѣчаетъ и наказуетъ такоже, какъ здѣ писано.

60. О торговыхъ и о лавочныхъ людѣхъ по тому же, счетъ съ ними часто держати.

А которые въ лавкахъ торгуютъ, и на домовной обиходъ покупаютъ вся́кую потре́бу и на всякой запасъ, — ино съ тѣми въ вечерѣ и на упокой, на всякую недѣлю, самому государю надобеть смѣчатися съ ними и въ приходѣ и въ росходѣ, и въ куплѣ и въ продажѣ: съ тѣмъ ве́черъ, а съ инымъ иной вечеръ; а кто береженъ и памятенъ, и радитъ о своемъ дѣлѣ, и все въ счетѣ живетъ у него и хитрости въ немъ нѣтъ ни которые и прибы́точекъ отъ него есть, — и того примолвити и пожаловати ѣствою и питіемъ, и нужа его́ пополнити во всемъ; а за доброй промыслъ, на выймокъ своимъ платьемъ пожаловати; а кто безхитростно что учинить, или лѣнивъ, или поздно въ лавку ходитъ, или спитъ долго; или кто съ товаромъ не ходитъ къ гостѣмъ или какое его небреженіе и нерадѣніе, — ино его наказывати и бранити; и, по винѣ смотря, такова ему и пеня учинити. А за до́брую службу, тѣхъ у себя́ за столъ сажати, и отъ себя́ подава́ти, и жаловати, и во всемъ ихъ беречи́. А во вся́кой службѣ и въ дома́шнемъ обиходѣ, и въ торговлѣ, кто лѣнивъ, и сонъливъ, и крадливъ и упья́ньчивъ, и наказаніе и побо́и не́имутъ, — и тово отъ дѣла отста́вити, и по не́мъ рабо́тати. А кто глупъ и гру́бъ, и крадливъ и лѣнивъ, и ни во что не пригодится, и наказаніе, ни ударъ неиметъ: ино, накорми́въ, да съ двора спустить: и иные, на такова́ дурака́ глядя, не испортятся.

61. Какъ дворъ строити, или лавка, или деревня или анбаръ.

Всякому человѣку домовитому доброму, у кого Богъ послалъ свое́ подворе́нце, или дереве́ньку, или ла́вочку въ торгу́ или анбаръ, или домы ка́меные, или варницы, или мелницы, — ино бы было, по прежеписанному, вся́кой запасъ купленъ въ пору, коли́ де́шево. Да вездѣ на дворѣ всегды у себя смотрити, или ключникъ или кому́ приказано: или тынъ попортилъся или городба́ въ по́лѣ или въ огородѣ; или ворота́, или замки́ попортилися; или которой хоромины кровля гнила́ или обетшала; или жо́лобы засорилися: все то смывати и мести́, жо́лобы вычищати, и перекрывати, и перекрѣпливати; кое́ поветшало, или поломилося или прокапало, или вѣтрамъ подрало; или въ избѣ, или въ которыхъ хоромѣхъ — столъ, лавка, или скамья, или печь попортилася; или на погребѣ или на ледникѣ, или въ мылнѣ, или мостъ, — и гдѣ што нибудь попортилося; или порядня домови́тая, какая нибуди дворовая или какая: или поваренная, или конюшенная, или погребная; или всякое платно и сапогъ: все бы было ветшаное поплачено́, а порченое покрѣплено́; а все бы было и тве́рдо, и крѣпко, и не́ згнило, и не накапало, и не нагрязнено, и не намочено, и въ кровлѣ, и въ суши. И тому подворью и всякому обихо́ду домо́вному, — старостію обетшанія нѣтъ: всегды живетъ вновѣ. А пе́чи всегды посматриваютъ внутри: и на печи́ и по сторонамъ; и щели замазываютъ глиною; а по́дъ новымъ кирпичемъ поплати́тъ, гдѣ выломалося. А на печи́ всегды бы было сметено́; ино николи́ притчи отъ огня́ не страхъ, — и спать на ней хорошо, или чево́ посушить; и у всякой бы пе́чи, надъ челомъ, былъ искренинъ глинянъ или желѣзенъ; и, хоти́ и низокъ потолокъ, ино не страхъ огня. А всегды бы были всякіе хоромы чи́сто метены́ и сухи, и не нагрязнены, и не засорены́, а на дворѣ и передъ вороты, всегды, послѣ снѣгу, згребено, и свожено и сметено; а посьлѣ дожжа грязь пригребена, и не надобно — пристроено, и не насорено, и не заволочено; а въ сушу приметено: ино всегды въ подворьѣ чисто, и сухо, и не нагрязнено; а метлы и лопаты и всякой запасъ, и всякая поря́дня, по двору бы не валялась: все бы было прибрано и припря́тано. А на дворѣ, и въ огородѣ, колодязь бы былъ; а нѣтъ колодязя, ино бы вода всегды была: а лѣтѣ и по хоромомъ вода бы стоя́ла, пожарныя ради при́тчи. А коли́ избу или мылню топи́ть; — а вода бы напередь принесена пожарныя ради при́тчи. А вода, съ рѣки, припасати по утру рано; а дровъ потому же; а почерпсти воды, изъ рѣки или изъ колодезя, благословяся, и судна пополоскати, въ чемъ везти или нести; а гдѣ поставити — была бы всегда покрыта.

62. Какъ дворовое тягло плотитъ, или съ лавки поземъ, или съ деревни подать, и должникомъ долгъ всякой платить.

А всякому человѣку, съ своего́ подворья или съ лавки поземъ и съ деревни и со всякого угодья да́ни и пошлины и всякого обро́ку и вся́кихъ даней, и всякихъ государскихъ податей — на себѣ не задерживати, копи́ти не вдругъ, а плати́ти ранее, до сроку; и ты безъ работы живешь; и отъ сроку и отъ поруки денегъ не даешь; и поми́нковъ не но́сишь, и самъ не таска́ешся. А кто на срокъ всякихъ обро́ковъ, и вся́кихъ тяглей не платитъ, а отъ того откупается, — и, двѣ да́ни будетъ, ино уже вдво́е будетъ платить. И такъ неразсудные люди живутъ; въ рабо́тѣ и на пра́вежѣ; и въ долгу́ до коньца обнищаетъ. А кто живетъ въ роспла́тѣ, и въ упра́вѣ, и всякихъ податей за собою не клачиваетъ и долгу на себѣ безлѣничново не водитъ и тотъ человѣкъ всегды безъ рабо́ты живетъ, и свобо́денъ, и при животѣ добро, и по смерти дѣтемъ поми́нокъ и надѣлокъ; дворъ со всѣмъ запасомъ, или лавка съ товаромъ, или деревня со всякимъ живото́мъ, — толко ни въ кабалахъ, ни въ записѣхъ, ни въ порукахъ, ни въ какихъ тяглѣхъ, ни въ какихъ податѣхъ не зорощено. А лучится кому денегъ занять бескобально, или въ кобалу, или закладъ, или безъ росту, — ино бы на сро́къ платить: ино и впередъ добрые люди вѣрятъ. А хто на срокъ не платитъ, или ро́сту напередь не уплачиваетъ — ино съ убыткомъ и со студомъ платежъ и впредь никто не вѣритъ.

63. Указъ ключнику, какъ держать на погребѣ всякой запасъ просольной, и въ бочкахъ, и въ кадѣхъ, и въ мѣрникахъ, и во тчанѣхъ, и въ ведерцахъ: мясо, рыба, копуста, огурцы, сливы, лимоны, икра, рыжики, грузьди.

Все бы то сто́яло, не початые и початы́е сосуды, въ росо́лѣ, да пригнетено доще́чкою, да и ка́менемъ тежелымъ; а огурцы, и сли́вы, и лимо́ны, въ росолѣ же бы были; а огурцы, рѣше́точкою жъ пригнетены, подъ камешкомъ, ле́гонько; а плѣснь всегды́ счищать, и росоломъ допо́лнивати; а кото́рой росо́лъ пахнетъ за́тхолы, и его слива́ть, да свѣжимъ допо́лнивати, россоливъ, та толко которой просолъ не въ росо́лѣ стои́тъ, ино верхней ря́дъ згніе́тъ, а не въ береже́нье, ино испо́ртится; а то все въ лѣтѣ все засѣкати; а мясо по́ времени вывѣшивати; а и въ ры́бѣ толко духъ появи́тся, ино перемывъ, вывѣшивать же; а кото́рая рыба всякая и мясо солено́ на провѣсъ, и вывѣшивати подъ весну; и какъ вы́вѣтрѣло, и ѣсть поспѣло, — ино отстропа збирати, да переносити въ суши́ло; да что пригоже — вѣшати, а иное въ стопу кластн; а рыба прутовая въ рого́жи вертѣть, а пласти по полицѣ кла́сти; а подпариваная въ кро́шню, чтобы вѣтръ проходи́лъ: кото́рая какъ пригоже, такъ дерьжа́ти. А о всемъ о томъ: какъ беречи́, — въ нача́лѣ писано. — А въ житницахъ, и въ закромѣхъ, и въ сушилѣхъ, — всякого обилія пересматривати: при́тчею которою: нака́пало или навья́ло, или сы́ро или затхлося, или поплѣсневѣло, или слегло́ся, — ино то, разсыпавъ на со́нцѣ, пересу́шивати, или въ печѣхъ; а что нопо́ртилося, ино то напере́дъ ѣсти, и въ заи́мъ дава́ти, и ми́лостыню, и ну́жнымъ; а толко много, ино упрода́стъ; а которой свѣжей сухой въ береженье стоитъ, ино то вдаль блюсти. А питье всякое: и ме́ды, и пива́, и мо́рсы, и вишъни въ патокѣ, и я́блока, и гру́ши въ патокѣ, и въ квасу́, и брусничная вода́, — по тому же: кои бочки въ леду́ засѣчены: и тѣ держати впо́лнѣ; а которое питье стои́тъ не впо́лнѣ, ино дополнивати, и въ леду́ засѣка́ти; а толко которое питье тронулося, оки́сло, или поплѣсневѣло, — ино то, по малымъ судомъ растачивати, да то борзо изведетъ; а которое свѣжее, вдаль блюсти́, и впо́лнѣ держати, — и я́блока, и груши, и вишни, и ягоды, — то бы было въ росо́лѣ; а плѣснь счищать, и, подсытивъ, доливать; и, что, какъ пригоже. А на ледникѣ полное питье и ѣству, въ леду засѣкши, держать: ино не портитца. А пла́тье вся́кое, и това́ръ, которое въ пола́тахъ, и въ клѣтѣхъ, и въ анба́рѣхъ, и въ лавкахъ, и въ сундукѣхъ, и въ бо́чкахъ, и въ коробьяхъ, — и верьхнее и нижнее, и но́вое и ветчаное, дорого́е и дешевое и у́счины и поло́тна: того́ всего, лѣтѣ, пересма́тривати; и развѣшивати, и пересушивати, и перетря́сывати; а которое попортилося, того починить, — и но́вого и ветчаного; и опя́ть, по старому, хорошо укла́дывати; и держать то въ сушѣ и въ покрытѣ, и за замкомъ. — А сѣно толко нака́пало, или́ навья́ло, или́ сыро, или́ слеглося, или́ затхлося, — ино его́, въ ведреной день, въ солнечной, и на вѣтръ выносить изъ сѣнницы, да просушить и перетрясти, да и опять въ сѣнницу скласть. А въ стогу́, толко слегло́ся, или затхлося, — по тому же разослать и перетрясти и просушить, и опять хорошенько сметать; да толко таково — ино продастъ, или лошедми кормить: да то изво́дитъ, кое́ попо́ртилося; а много, — ино продастъ; а кое́ доброе, — ино дале блюсть, и въ сушѣ покласть, и сѣнницы укрыти.

64. Посланіе и наказаніе отъ отца къ сыну.

Благословеніе отъ Благовѣщеньскаго попа Селивестра возлюбленному моему, единородному сыну Анфиму.

Милое мое чадо, дорогое! Послушай отца своего наказаніе, рождьшаго тя, и воспитавшаго въ до́бре наказаніи и въ заповѣдѣхъ Господнихъ; и страху Божію и Божественому писа́нію изучену, и всякому зако́ну христіяньскому; и про́мыслу до́брому во всякихъ торговлѣхъ и во вся́кихъ това́рѣхъ нака́зану; и святительское благословеніе на себѣ имѣешь, и Царское Государево жалованіе, и Государыни Царицы, и братіи его, и всѣхъ Боляръ; и съ добрыми людми́ во́дишися; и со многими иноземцы великая торговля и дружба есть; все еси доброе получилъ, и умѣй еси совершити о Бозѣ: яко же нача́то при нашемъ попеченіи, и по насъ тако же бы Богъ соблюлъ по тому жити.

И законному браку сочтахъ тебѣ у добру́ роди́телю благода́рную дщерь; и благословилъ есми тебя́ всякою святынею, и честными кресты и святыми образы, и благослове́ннымъ стя́жаніемъ, якоже мню отъ праведныхъ трудовъ, а въ невѣданіи Богъ прави́тель.

И нынѣ убо, сыну Анфимъ, предаю тебѣ и поручаю и оставляю Создатели нашему, доброму блюстителю, Іисусу Христу, и Его Матери, Пречистыя Богородица, и Заступницѣ нашей, Помощницѣ, и всѣмъ Святымъ: якоже рече писаніе: потщися дѣти оставити нака́заны въ за́повѣдѣхъ Господнихъ, лучше неправеднаго богатества, аще и въ праведнемъ убожествѣ, неже бы въ неправеднемъ богатествѣ. И ты, чадо, блюдися неправеднаго имѣнія, а твори добрая дѣла. Имѣй, чада, великую вѣру къ Богу; все упованіе возлогай на Господа: ни кто же, надѣяся на Христа, не погибнетъ. Прибѣгай всегды съ вѣрою ко святымъ Божіимъ церквамъ; заутрени пе просыпай; обѣдни не прогуливай; вечерни не погрѣши и не пропивай: па́вечерница, и полунощница, и часы́, въ дому своемъ всегды, по вся дни, пѣти: то всякому христіанину Божій долгъ. Аще возможно, по́ времени, прибавишь правила: на твоемъ произволеніи: бо́лшую милость отъ Бога обрящеши. — А въ церкви Божіи и дому́, на правилѣ и на всякомъ моленіи, и самъ, и жену, и дѣтей, и домочатцовъ, стояти со́ страхомъ; Богови молитися, и со вниманіемъ слушати, отнюдь въ тѣ поры ни о чемъ не бесѣдовати, ни обзиратися, развѣ ли кія нужда. А говорити правило келейное и церковное единогласно, чи́сто, а не вдвое. — Священническій чинъ и иноческій почитай: тѣ бо суть Божіи слуги: тѣми очищаемся отъ грѣховъ; тѣ имѣютъ дерзновеніе молитися Господу о гресѣхъ нашихъ, и Бога милостива сотворятъ. — Повинуйся, чадо, отцу духовному, и всякому священническому чину, во всякомъ духовномъ наказаніи; а жена тако же. Въ домъ свой ихъ призывай молитися о здравіи за Царя и Государя, и за Царицу и чада ихъ, и за братію его, и за священническій чинъ и мнишескій, и за вся христіане; и о своемъ согрѣшеніи и о своихъ домочадцевъ молебная совершай: и воду бы святили съ животворящаго креста и со святыхъ мощей, и съ чюдотворныхъ образо́въ; аще болѣзьни ради, за здравіе и масломъ свящаютъ. И въ церквахъ Божіихъ тако же твори; приходи съ милостынею и съ приношеніемъ, за здравіе, и по родителѣхъ преставльшихся память твори, со всякою чистотою: и самъ воспомяновенъ будеши отъ Бога. — Церковниковъ, и нищихъ, и маломожныхъ, и бѣдныхъ и скорбныхъ, и странныхъ прише́лцовъ, призывай въ домъ свой, и по силѣ накорми и напой и согрѣй; и милостыню давай, отъ своихъ праведныхъ трудо́въ, и въ дому́ и въ торгу́ и на пути́: тою бо очищаются грѣси́, тѣ бо ходатаи Богу о грѣсѣхъ нашихъ.

Имѣй, чада, истинную правду и любовь нелицемѣрную ко всѣмъ; не осужай никого ни въ чемъ: свои грѣхи разсужай, како избы́ти ихъ. — Чево самъ не любишь, того и другу не твори, и храни чистоту тѣлесную паче всего; да наступи на совѣсть свою, яко же на лютаго врага: и возненавиди, якоже милаго, душетленнаго друга, хмельново питья. Господа ради отверзи отъ себѣ піяньство; въ семъ убо недугѣ, и вся злая ражаются обы́чаи отъ него. Аще отъ сего сохранитъ тя Господь, вся благая и полезная отъ Бога получиши, и отъ человѣкъ чесьтенъ будеши, и души своей про́свѣтъ сотвориши на вся добрая дѣла. — Воспомяни, чада, Апостольское слово: „не прельщайтеся: ни пьяница, ни блудникъ, ни прелюбодѣй, ни содомленинъ, ни тать, ни разбойникъ, ни клеветникъ, ни хищникъ, царствія Божія не наслѣдятъ“. — Аще которою страстію побѣдился еси, чадо, или въ которое грѣхопаденіе впалъ, о семъ прибѣгни къ Богу, съ теплою вѣрою, и ко отцу духовному съ горкими слезами; и плачися о грѣсѣхъ своихъ, и кайся истиннѣ, еже таковая не творити; и заповѣдь отца духовнаго храни, и эпитемью держи: милостивъ Господь, праведныхъ любитъ, грѣшныхъ ми́луетъ, всѣхъ зоветъ ко спасенію. И, паки, храни и блюди себе въ христіяньскомъ жити праведномъ законѣ; удержи языкъ свой отъ зла, и устне свои еже не глаголати льсти; храни себе ото лжа́, и отъ похвалы, и отъ клеветы; и самъ ни въ чемъ не величайся; уничижи себе паче всѣхъ человѣкъ, узриши славу Божію. — И всякого, чада, не презри во всякой нужи; памятуй, чадо, како мы́ жихомъ: вѣкъ никто же изыдѣ отъ дому́ нашего тощь или скорбенъ; по силѣ, вся потребная, всякому человѣку, Бога ради, да́вано; и скорбново́ словомъ по́лзовано; аще кому, въ чемъ возможно, и мы́ помогали, Бога ради, и ссужали вс́ячески; а намъ, невидимо, Христосъ изобилно посылалъ милость Свою, всякихъ благихъ. А не помыслихомъ никогда на зло, ни кому, разьвѣ недоразумія, а безъ лукавства.

Чадо, люби мнишескій чинъ, и странніи пришелцы всегда бы въ дому́ твоемъ питалися; и въ монастыри съ милостынею и съ кормлею приходи и въ темни́цахъ и убогихъ и больныхъ посѣщай; и милостыню по силѣ давай.

А домочадцовъ своихъ одѣвай, и корми доволно. А жену свою люби, и въ законѣ живи, по заповѣди Господни. Въ недѣлю, и въ средъ, и въ пятокъ, и въ празники Господни, и великій постъ въ чистотѣ пребывайте, въ постѣ и молитвѣ, и въ покаяніи, и во всякихъ добродѣтелѣхъ. Законное жительство въ славу Богу и въ жизнь вѣчную; а инымъ … судитъ Богъ.

Да самъ, чадо, что твориши, того жену учи: всякому страху Божію, и всякому вѣжьству и промыслу и рукодѣлью, и всякому рукодѣлью и домашнему, обиходу; и всякой поря́днѣ. Умѣла бы сама и печи́ и вари́ти, и всякую домашнюю поря́дню умѣла, а всякое женьское рукодѣлье зна́ла; коли сама все знаетъ и умѣетъ, ино умѣетъ и дѣтей и слугъ всему научити, и наряжати, и наказати во всемъ; и сама бы хмелново питья отнюдь не любила, и дѣти и слуги у ней того не любили же. — А всегда бы жена безъ рукодѣлія сама ни на часъ не была, развѣ не́мощи, а слуги у ней тако же. А въ го́стѣхъ будетъ, или у ней гости, отнюдь бы сама пья́на не была; а съ го́стьями бесѣда бы была о рукодѣльи, и о домашней поряднѣ, и о законномъ христіяньскомъ житіи, а не пересмѣивайся, и не переговаривала бы ни о комъ ничево. Въ гостѣхъ и въ дому́ пѣсней бѣсовскихъ, и всякого срамословія, сама и слуги, не говорила и не творила бы того; ни у кого бы не слушала. И волхвовъ и куде́сниковъ, и всякого чарованія не знала бы; и въ до́мы не пущали ни мужиковъ ни женокъ. Аще не внимаетъ сего, всячески наказуй, страхомъ, и спасая; а не гнѣвайся на жену, а жена на тебѣ; наказуй наединѣ; да наказавъ примолви: и жалуй и люби ея. Тако же и дѣтей и домочадцовъ своихъ учи страху Божію и всякимъ добрымъ дѣломъ; понеже тебѣ о нихъ отвѣтъ дати въ день страшнаго суда. Аще по нашему наказанію и по сему писанію учнете жити, велію благодать отъ Бога обрящете, и жизнь вѣчную наслѣдите, и съ домочадцѣ своими.

Да держися, чадо, добрыхъ людей, во всякихъ чинѣхъ, и ревнуй добрымъ дѣломъ ихъ; внимая словеса́ добрые и твори я. Почитай часто Божестьвеное писаніе, и влагай въ сердце, себѣ на пользу.

Видѣлъ еси, чадо: како въ житіи семъ жихомъ, во всякомъ благоговѣніи и страсѣ Божіи, и въ простотѣ сердца и церковномъ прилежаніи со страхомъ, и Божественымъ писаніемъ ползуючися всегда; и како былъ Божіею милостію, отъ всѣхъ почитаемъ, и всѣми любимъ, и всякому, и въ потребныхъ, уноровилъ: и рукодѣліемъ и службою и покореніемъ; а не гордынею, ни прекословіемъ; не осужахъ никого, не просмѣивалъ, ни ука́ривалъ никого, ни бранивался ни съ кѣмъ; и пришла отъ кого обида, и мы́, Бога ради, терьпѣли, и на себя вину полагали; и тѣмъ враги други быша; и аще которою виною, душевною или тѣлесною, согрѣшихъ предъ Богомъ и предо всѣми человѣки, и вскоро о томъ плакахся къ Богу грѣха своего; и у отца своего духовнаго каяхся со слезами, и умилне прощенія прося, и заповѣди его духовныя съ любовію храня́хъ, яко же повелитъ ми; и аще кто мя въ моемъ прегрѣшеніи, или въ каковѣ невѣжьствѣ обличитъ, или кто духовне накажетъ, или кто въ посмѣхъ поноситъ мя и укоряетъ, вся сія съ любовію пріимахъ, и себѣ внимахъ; аще по дѣломъ, о всемъ о семъ каяхся, и отъ таковыхъ дѣлъ удаляхся, Богу поспѣшествующу ми; аще что и не повинно, и не по дѣлу, молва, или поношеніе, или посмѣхъ каковъ, или укоризна, или удареніе, — во всемъ въ томъ винихся, и не оправдахся предъ человѣки: Богъ сіе праведнымъ Своимъ милосердіемъ исправитъ. Воспоминахъ Евангельское слово: любите враги ваша, добро творите ненавидящимъ васъ, благословите кленущія вы, молите за творящая вамъ пакости, изгонящая вы; біющему тя въ ланиту, обрати ему и другую, и отъ взимающаго ти ризу, и срачицу не возбрани; и всякому просящему у тебе дай; отъ взимающаго твое, не изтязуй; аще кто тя пойметъ поприще едино, иди съ нимъ и двѣ. И паки еще вопоминая причастную молитву: Господи, даждь ми милость, ненавидящимъ ми и враждующимъ ми и поношающимъ ми, тако же и оклеветающимъ мя: да никто же, ни како же, отъ нихъ, мене ради нечистаго и грѣшнаго, зло нікако постражетъ, ни въ нынѣшнемъ ни въ будущемъ вѣцѣ; но очисти ихъ милостіею Своею, и покрый ихъ благодатію Своею, Благій!

Тѣмъ всегда утѣшахъ себѣ.

Не погрѣшихъ никогда же церковнаго пѣнія, отъ юности своея и до сего времени, кромѣ немощи.

Ни нища, ни странна, ни убога, ни скорбна, ни печална, никогда же презрѣхъ, кромѣ невидѣнія.

И въ темницы болна и пьлѣне́на, и изъ работы должьна, и во всякихъ нужахъ, по силѣ окупихъ, и гладныхъ, по силѣ кормихъ.

Работныхъ своихъ всѣхъ свободихъ и надѣлихъ; и ины окупихъ изъ работы, и на свободу попущахъ. И всѣ тѣ работные наши свободны, и добрыми домами живутъ, яко же видиши, и молятъ за ны Бога, и доброхо́таютъ намъ всегда, а кто забылъ насъ, Богъ его проститъ во всемъ. А нынѣ домочадцы наши всѣ свободны, живутъ у насъ по своей воли.

Видѣлъ еси, чадо мое: многихъ пустошныхъ сиротъ и работныхъ и убогихъ, мужеска полу и женьска, и въ Новѣгородѣ, и здѣ на Москвѣ вскормихъ и вспоихъ, до совершена возраста; изучихъ, хто чево достоинъ: многихъ грамотѣ, и писати и пѣти, иныхъ иконного писма, инѣхъ книжного рукодѣлія, овѣхъ серебреново мастерства́, и иныхъ всякихъ многихъ рукодѣлей, а иныхъ всякими многими торговли изучилъ торговать. А мати твоя многія дѣвицы и вдовы́ пустошныя и убогія, воспитала въ до́бре наказаніи, изучила рукодѣлію, и всякому домашнему обиходу, и, надѣливъ, за́ мужь давала; а мужескій полъ поженили у добрыхъ людей. И всѣ тѣ, далъ Богъ, свободны: своими добрыми домами живутъ; многи во священническомъ и во дьяконьскомъ чину, и во дья́цѣхъ и въ подья́чихъ, и во всякихъ чинѣхъ; кто чево́ дородился, и въ чемъ кому благоволилъ Богъ быти. Овіи рукодѣльничаютъ всякими про́мыслы; а многія торгуютъ въ лавкахъ; мнози и́ госдьбы дѣютъ, въ различныхъ земляхъ, всяки торговлями. А, Божіею милостію, во всѣхъ тѣхъ нашихъ скормленикѣхъ и послужи́вцѣхъ, ни соромо́та, ни убытокъ, никакая продажа отъ людей, ни людемъ отъ насъ, ни тяжа ни съ кѣмъ не бывала; во всемъ Богъ соблюлъ но сямѣста, а отъ кого намъ, отъ своихъ скормлениковъ, досада и убытки многи и велики бывали, ино то все на себѣ понесено́, нихто того не слыхалъ, а намъ то Богъ исполнилъ.

И ты, чадо, тому же ревнуй, и тако твори: на себѣ всякую обиду понеси и претерпи: Богъ сугубо исполнитъ.

Живи, чадо, по христіанскому закону, во всякихъ обычаехъ, безъ лукавства и безо всякія хитрости ко всѣмъ. А не всякому духу вѣруй: доброму ревнуй; лукавыхъ и законопрестунныхъ, во всякихъ обычаехъ, отнюдь не люби … И пьяньственаго недуга такоже берегися: въ дву сихъ главизнахъ вся злая сводятся, до ада преисподняго, и домъ пустъ; имѣнію тщета; и отъ Бога не помилованъ будетъ, и отъ людей безчестенъ и посмѣя́нъ и укоренъ, и отъ родителю проклятъ. Аще, чадо, тебя отъ сего зла Господь сохранитъ, законъ сохраниши по заповѣди Господни, а отъ хмелного питья воздержися, и во всякихъ добродѣтелѣхъ поживеши, якоже есть богобоязнивіи люди, и ты отъ Бога помилованъ будеши, а отъ людей честенъ; и исполнитъ Господь домъ твой всякою благодатію.

И еще воспомянути: госте́й пріѣзжихъ у себя корми; а на сусѣдствѣ и съ знаемыми любовно живи, о хлѣбѣ и о соли, и доброй здѣлкѣ, и о всякой ссудѣ.

А поѣдешь куды въ го́сти, поминки не до́роги вози за любовь.

А въ пути, отъ стола, ѣсть подавай домо́внымъ государемъ, и приходящимъ, и ихъ съ собою сажай за столъ, и питейца́ такоже подавай; а маломо́жнымъ милостыню давай. Аще сія твориши, то вездѣ тебя ждутъ и стрѣчаютъ; а въ путь провожаютъ; отъ всякого лиха берегутъ, на стану не подадутъ; а на дорогѣ не разобьютъ; того ради кормятъ: добраго за добро, а лихова отъ лиха: тотъ ся на добро обратитъ. Во всемъ въ томъ убытка нѣтъ: въ добрыхъ людѣхъ хлѣбъ-соль заемное дѣло, а поминки тако же, а дружба въ вѣкъ, а слава добрая. А на дорогѣ, и въ пиру, и въ торговлѣ, отнюдь самъ брани не зачни; а кто излаетъ, терпи, Бога ради, а отъ брани уклонися: добродѣтель злобу преодолѣваетъ: Господь бо гордымъ противится; смире́на Богъ любитъ, а покоре́ному Богъ благодать даетъ.

Аще людѣмъ твоимъ лучитца съ кѣмъ брань гдѣ нибудь, и ты на своихъ брани; а кручи́новато дѣло, и ты ударь, хоти и твой правъ: тѣмъ брань утолиши, такоже убытокъ и вражда не будетъ. Да еще не́друга напоити и накормити хлѣбомъ да солью: ино, вмѣсто вражды, дружба.

Воспоминай, сыну, великое Божіе милосердіе къ намъ и заступленіе отъ юности, и до сего времени, на поруку не давалъ никого, ни меня не давывалъ никто, во всякихъ вещѣхъ; и на судѣ не бывалъ ни съ кѣмъ: ни искивалъ, ни отвѣчивалъ. А видѣлъ еси самъ: въ рукодѣяхъ, и во многихъ, во всякихъ вещѣхъ, мастеровъ всякихъ было много: иконники, книжные писцы, серебреные мастеры, кузнецы, и плотники и каменьщики, и всякіе, и кирпищики и стѣньщики, и всякіе рукодѣлники; деньги имъ давоны на рукодѣлье, напере́дъ, по рублю, и по два и по́ три, и по пяти, и до десяти, и болши; а многи были чмуты и бражники; и, со всѣми тѣми мастеры, въ сорокъ лѣтъ, далъ Богъ, розле́зенося безъ остуды, и безъ приста́ва, и безо всякія кручины. Все то мирено хлѣбомъ да солью, да питьемъ, да подачею и всякою добродѣтелью, да своимъ терпѣніемъ. А самъ у кого што купливалъ, ино ему отъ мене милая разласка; безъ волокиды платежъ, да еще хлѣбъ да соль сверхъ. Ино дружба въ вѣкъ: ино всегда мимо мене не продастъ, и худого товару не дастъ, и у всего не дойметъ. А кому што продавывалъ, все въ любовь, а не въ обманъ; не полюбитъ хто моего товару, и азъ назадъ возму, а денги отдамъ: а о купли и о продажи ни съ кѣмъ брань и тяжбы́ не бывала; ино добрые люди во всемъ вѣрили, и здѣ, и иноземцы. Ни кому ни въ чемъ не сьлыгивано, ни манено, ни пересрочено, ни въ рукодѣльи, ни въ торговли. Ни кабалы ни записи на себя ни въ чемъ не давывалъ, а ложь никому ни въ чемъ не бывала: а видѣлъ еси самъ, какіе великіе сплетки со многими людьми были; да все, далъ Богъ, безъ вражды коньчалося. А вѣдаешь и самъ, что не богатествомъ жито съ добрыми людми́: правдою да ласкою да любовію, а не гордостію, и безо всякія лжи.

Чадо мое любимое, Анфимъ! Еже тя поучахъ и всячески наказывахъ о всякомъ добродѣтелномъ и богодуховенномъ житіи, и грубое сіе писаніе худаго моего ученія предахъ ти, молю тя, чадо, Господа ради и Пречистой Богородицы, и великихъ чюдотворцевъ, почитай себѣ, съ любовію и со вниманіемъ, и напиши на сердци своемъ; и прося у Бога милости и помощи, и разума и крѣпости, и вся предреченная, съ любовію и дѣломъ, тако же, по сему писанію, и жену поучай и наказуй; тако же и дѣтей своихъ и домочадцовъ; всѣхъ учи страху Божію и добродѣтелному житію. И, аще самъ вся сія твориши, и жену и дѣтей, и рабъ и рабынь, и всѣхъ ближнихъ своихъ и знаемыхъ научи́ши, и домъ свой до́бре устроиши, вся благая отъ Бога обрящеши и жизнь вѣчную наслѣдиши, со всѣми одержимыми тобою. Аще, сыну, моего моленія и поученія не внемлеши, и по сему писанію не учнеши жити, яко же и прочіи добрые люди и боя́знивіи мужіе, и отца духовнаго заповѣди не учнешь хранити, и отъ богодухновеннымъ мужей не пользуешися поученіемъ, и почитаніемъ святаго писанія, и христіанскаго праведнаго закона не храниши, и о домочадцѣхъ своихъ не радиши, — и азъ твоему грѣху не причастенъ: самъ, о себѣ и о домочадцѣхъ своихъ и о женѣ, отвѣтъ даси въ день страшнаго суда. Аще, чадо мое возлюбленное, и малыя сія заповѣди худаго моего ученія сохраниши, и по нашему пути пойдеши, и словесъ моихъ послушаеши, и дѣломъ творити начнеши, и будеши сынъ свѣту и наслѣдникъ небесному царствію, и будетъ на тебѣ милость Божія, и Пречистыя Богородицы и Заступницы нашея, и великихъ чтодотворцевъ: Николы, Петра, Алексѣя и Сергія и Никона, и Карила и Варлама и Александра, и всѣхъ Святыхъ, и родительская молитва, и мое вѣчное на тебѣ благословеніе, отъ нынѣ и до вѣка; и благословляю тебя, чада своего, и прощаю, въ семъ и въ будущемъ; и буди на тебѣ милость Божія; и на женѣ твоей и на чадѣхъ твоихъ, и на всѣхъ вашихъ доброхотавъ, отъ нынѣ и до вѣка!

Чадо мое, единоро́дное и любимое, Анфимъ! производилъ Богъ, и Благочестивый и Православный Царь Государь велѣлъ послужити тебѣ въ своей Царской казнѣ, у таможенныхъ дѣлъ; и нынѣ молю тя, чадо, и со слезами глаголю: Господа ради памятуй Царское наказаніе, прося у Бога помощи и разума отъ всея душа и отъ всего помышленія; служи вѣрою и правдою, безо всякія хитрости, и безо всякаго лукавства; во всемъ Государьскомъ другу не дружи, не́другу не мсти, и волокида бы людѣмъ ни въ чемъ не была; всякого отдѣлай съ любовію, безъ брани; а не поспѣется, и ты добрымъ словомъ отвѣщай; и присрочивъ, не изволоча, отпусти: а въ торговли прямую разласку чини: душевредная бы твоя служба не была Государю ни въ чемъ; а самъ, благословленнымъ Государьскимъ урокомъ сытъ буди; и все бы у тебя Государьское было всегда въ счетѣ, и въ смѣтѣ, и въ писмѣ, и приходъ и расходъ; и къ казначеемъ буди послушенъ, и съ товарищами совѣтенъ, а къ подьячимъ и мастеромъ, и къ сторожѣмъ, гро́зенъ и любовенъ, и ко всякимъ людѣмъ привѣтенъ, и побѣдныхъ и скорбныхъ и нужныхъ, и полоненико́въ, отнюдь безъ волокиды управъ; и отъ себя, по си́лѣ, накорми и напой, и милостыню дай, по человѣку смотря́; а случится судъ: всякому человѣку, богату и убогу, другу и не́другу, аще свое дѣло истинно и праведно, безъ волокиды и безо всякія хитрости соверши; по Евангельскому словеси: не на лица́ судите, сынове человѣчестіи, но праведенъ судъ судите, имъ же судите судомъ, судится вамъ, въ ню же мѣру мѣрите, возмѣрится.

Слава Свершителю Богу, нынѣ
и въ вѣкъ вѣка.
Аминь.

УКАЗЪ СВАДЕБНОМУ ЧИНУ.

Эта статья составляетъ послѣднюю 90-ю главу Домостроя по рукописи Московской патріаршей (синодальной) Библіотеки. Печатается по тексту архимандрита Леонида, напечатанному въ Изв. Имп. Общ. исторіи и древн. Рос. М. 1874, кн. 1. Другой менѣе исправный списокъ помѣщенъ въ „Сказаніяхъ русскаго народа“ Сахарова.

Поставити мѣсто, да обити ковромъ; а на мѣсто положити подушка атласная, или бархатъ золотной; да у мѣста держать, двумъ человѣкомъ, по сороку соболей. Да у мѣста жъ поставити столъ; а на столъ наслати двѣ скатерти: да поставити на столъ судки столовые; и перепечи, калачи, положити на блюды; да поставити сыръ; да перепеча положити, которая рѣзати. Да на другомъ блюдѣ поставити осыпало, хмель; да деньги золотыя и новгородки золоченыя. Да положити 9 соболей; да камокъ и тавтъ всякихъ. Да на третьемъ блюдѣ положити ширинка. Да на четвертомъ блюдѣ положити кика; да подъ кикою положити подзатыльникъ, да подубрусникъ, да волосникъ, да покрывало. Да поставити чарка золотая, или серебряная; а въ чарки поставити медку пемножко, да хмельку, да двѣ маковицы. Да гребешокъ положити у кики на блюдѣ.

Да по сторону мѣста поставити двѣ скамейки маленькія: на одной скамейкѣ сидѣти Тысяцкому, а на другой Свахѣ.

Да у мѣста стояти двумъ человѣкамъ: держати носилы съ короваемъ да съ сыромъ, покрывши отласомъ, или бархатомъ золотнымъ; и руковязи у носилъ опушити, у шлейки, камкою, или отласомъ золотнымъ. Да третьему человѣку держати свѣчю въ кошелькѣ: а кошелекъ отласный или бархатной золотный. Да двумъ человѣкомъ держати фонарь.

А тѣ всѣ люди въ кафтанахъ и въ терликахъ бархатныхъ, и въ камчатыхъ и въ отласныхъ, золотныхъ; да въ шапкахъ лисьихъ черныхъ.

И какъ новобрачный князь пріѣдетъ съ поѣздомъ: и коровайники и свѣщники съ фонаремъ придутъ, по тому же; и какъ, дастъ Богъ, новобрачный киязь сядетъ на мѣсто и, посидѣвъ немного, сваха станетъ, да благословляеца у отца да у матери: новобрачному князю и княгинѣ голову чесати. Возметъ соболи которые держатъ, и обноситъ тѣми собольми около головъ новобрачнаго князя и княгини, по трижды. А Дружка въ тѣ поры благословляется перепечи и сыръ рѣзати; и подноситъ сыръ и перепечи ко всѣмъ: къ отцу и матери, и къ новобрачному князю и княгинѣ, и ко всему поѣзду, и къ сидячимъ къ всѣмъ, хто будетъ въ избѣ. Да послати съ перепечею и съ сыромъ къ отцу и къ матери: хто будетъ сидячихъ у новобрачнаго князя, и къ тѣмъ, по тому жъ, посылати съ сыромъ и перепечею.

И какъ, Богъ дастъ, на новобрашнюю княгиню положатъ кику и покроютъ покрываломъ, и вставъ сваха, благословляется у отца и у матери: осыпати новобрашнаго князя и княгиню, а дружка въ тѣ поры понесетъ къ новобрашному князю и ко всему поѣзду ширинки на блюдѣ. Ко отцу и къ матери его, отъ новобрачныя княгини, послать съ ширинками жъ.

И какъ, дастъ Богъ, новобрашный князь и княгиня встанутъ съ мѣста и выступятъ въ сѣни, и въ тѣ поры стелютъ камки и тафты: по чему ити новобрашному князю до аргамака, а новобрашной княгинѣ до саней.

Ѣхати къ вѣнчапію въ санѣхъ. А сани поволочи отласомъ или тафтою. А въ сани положить подушка бархатная, или отласъ золотной и аминдеръ. А въ сани послати коверъ. А миндеръ обшити сукномъ червчатымъ. Да у саней держати сорокъ соболей: какъ новобрашная княгиня поѣдетъ къ вѣнчанію, и тѣ соболи держати на мѣстѣ въ санѣхъ.

И какъ новобрашный князь, у церкви сойдетъ съ аргамака, а новобрашная княгиня выйдетъ изъ саней, и стелютъ имъ подъ ноги камки и тафты до церковныхъ дверей по тому жъ.

А у вѣнчанія подложити подъ ноги новобрашному князю и княгинѣ камки или отласъ золотной, да по соболю. Какъ пойдетъ новобрашный князь отъ вѣнчанія до аргамака, а новобрашная княгиня до саней, ино подъ ноги слать по тому жъ. А сойдетъ новобрашный князь со аргамака, а новобрашная княгиня выйдетъ изъ саней, и пойдутъ на мѣсто, за столъ, и подъ новобрашнаго князя и подъ княгиню постилати по тому жъ. А какъ станутъ изъ за стола и выступятъ изъ горницы, ино постилати подъ ноги потому жъ, до сѣнника.

•••

При перепечатке ссылка на unixone.ru обязательна.

Добавить комментарий